លោកជំទាវកិត្តិសង្គហបណ្ឌិត ម៉ែន សំអន សម្ពោធដាក់ឲ្យប្រើប្រាស់ជាផ្លូវការមន្ទីរពេទ្យបង្អែក “សាមគ្គីស្រុករំដួល” ចំណាយថវិការ ៥៦មុឺនដុល្លា ដើម្បីបង្ខិតសេវាព្យាបាលរបស់ពលរដ្ឋ
លោកជំទាវកិត្តិសង្គហបណ្ឌិត ម៉ែន សំអន ប្រធានក្រុមការងាថ្នាក់ជាតិចុះជួយខេត្តស្វាយរៀង បានអញ្ជើញសម្ភោធដាក់ឲ្យប្រើប្រាស់ជា ផ្លូវការមន្ទីរពេទ្យបង្អែកសាមគ្គីស្រុករំដួល ស្ថិតនៅឃុំកំពង់ចក ស្រុករំដួល ខេត្តស្វាយរៀង ដែលចំណាយថវិការអស់ប្រមាណ ៥៦មុឺនដុល្លារ ថវិកាកសាងរបស់ សម្តេចអគ្គមហាសេនាបតីតេជោ ហ៊ុន សែន តាមរយៈ ឯកឧត្តម ខ្វាន់ ស៊ាម និង សម្បុរសជន នាព្រឹកថ្ងៃអង្គារ ៥រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែសីហា ឆ្នាំ២០១៩។
មានប្រសាសន៍សំណេះសំណាលក្នុងពិធីនោះផងដែរ ក្នុងនាមរាជរដ្ឋាភិបាលកម្ពុជា ក្រុមការងារគណៈកម្មាធិការកណ្តាល ចុះជួយខេត្ត ស្វាយរៀង និងក្នុងនាម លោកជំទាវផ្ទាល់ សូមគាំទ្រចំពោះ សម្តេចតេជោ នាយករដ្ឋមន្ត្រី ដែលបានយក ចិត្តទុកដាក់អំពីសុខុមាលភាពរបស់ប្រជាពលរដ្ឋនៅតាមមូលដ្ឋាន ដោយបានបង្កើតឲ្យមានមន្ទីរពេទ្យ ឬមណ្ឌលសុខភាពឲ្យនៅជិតផ្ទះរបស់លោកអ្នក ដើម្បីចូលរួមចំណែកក្នុងការកាត់បន្ថយនូវភាពក្រីក្រ ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមានវិស័យសុខាភិបាលជាវិស័យអាទិភាព។
លោកជំទាវ ម៉ែន សំអន បានណែនាំដល់បុគ្គលិកពេទ្យទាំងអស់ ជាពិសេសមន្ទីរពេទ្យបង្អែកនេះ ដែលកំពុងធ្វើប្រតិបត្ដិការផ្ដល់សេវាលើការសង្គ្រោះ និងពិនិត្យព្យាបាលជម្ងឺជូនប្រជាជន សូមប្រកាន់ភ្ជាប់នូវក្រមសីលធម៌វិជ្ជាជីវៈ និងតម្កល់នូវទឹកចិត្ដអាណិត ស្រលាញ់អ្នកជម្ងឺ ដែលជាអ្នកមកទទួល និងប្រើប្រាស់សេវានៅមន្ទីរពេទ្យ។ មន្ត្រីរាជការ បុគ្គលិកសុខាភិបាល នៅគ្រប់ជាន់ថ្នាក់ទាំងអស់ ត្រូវ បន្តការខិតខំអនុវត្តភារកិច្ចរបស់ខ្លួនដោយស្មារតីទទួលខុសត្រូវខ្ពស់ ជាពិសេសការលុបបំបាត់សេវាសុខាភិបាលខុសច្បាប់ និងឱសថក្លែងក្លាយ ដើម្បីផ្ដល់សេវាសុខភាពឱ្យកាន់តែមានគុណភាព សំដៅលើកកម្ពស់ប្រសិទ្ធភាពនៃការការពារ-សុខភាព និងព្យាបាលឱ្យកាន់តែប្រសើឡើង៕
