លោកជំទាវកិត្តិសង្គហបណ្ឌិត ម៉ែន សំអន អញ្ជើញកាន់បិណ្ឌវេនទី៩ នៅវត្តវិហារសសរ ១០០

កាលពីរសៀលថ្ងៃទី២១ ខែកញ្ញា ឆ្នាំ២០១៩ បានរៀបចំលេងភ្លេងប្រពៃណីខ្មែរ និងរបាំ ថ្វាយដល់បារមីនាងក្រពុំឈូក ស្ថិតក្នុងវត្តវិហារសសរ ១០០ បន្ទាប់មកទៀតបានបន្តកម្មវិធីសូត្រមន្តវេនកាន់បិណ្ឌទី៩ និងចែកអំណោយជូនប្រជាពលរដ្ឋជាង ១.២០០គ្រួសារ ក្នុង​មួយ​គ្រួសារ​ទទួល​បាន សារ៉ុង ១ និងថវិការមួយចំនួន។ លុះព្រឹកថ្ងៃទី២២ ខែកញ្ញា ឆ្នាំ២០១៩ លោកជំទាវក៏បាននាំយកនូវបច្ច័យ ទេយ្យវត្ថុ​ទៅវេរ​ប្រគេន​ព្រះសង្ឃនៅវត្តវិហារសសរ១០០ និងវត្តគោក ក្នុងវេនកាន់បិណ្ឌទី៩ និងរាប់បាត្រព្រះសង្ឃ ចំនួន១០២អង្គ ជាកិច្ចបង្ហើយបុណ្យផងដែរ។

ថ្លែង​ក្នុងពិធីនោះ លោកជំទាវក៏បានមានប្រសាសន៍ថា ដោយសាតែប្រទេសជាតិមាន សុខសន្តិភាពពេញលេញ ក្រោមការដឹកនាំ​ប្រកប​ដោយ​កិត្តិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន បានដឹកនាំប្រទេសឲ្យមានការអភិវឌ្ឍ និងមានការរីកចម្រើន​លើ​គ្រប់​វិស័យ ក្នុងនោះវិស័យព្រះពុទ្ធសាសនាក៏មានការរីកចម្រើនគួរឲ្យកត់សម្គាល់ផងដែរ ស្របពេលដែល​ប្រជាពលរដ្ឋ​ទូទាំង​ប្រទេស​កំពុង​ប្រារព្ធ​ពិធីកាន់បិណ្ឌ។ ចំណែកឯទឹកចិត្តសទ្ធាជ្រះថ្លានាថ្ងៃនេះបានកើតឡើងចេញពីការរួមសាមគ្គីពីសំណាក់ឯកឧត្តម លោកជំទាវ ឧកញ៉ា លោក លោកស្រី ទាំងអស់គ្នាបានបរិច្ចាកថវិកាផ្ទាល់ខ្លួនចូលរួមក្នុងការកសាង និងបានចូលរួមចំណែកយ៉ាងសំខាន់​ជាមួយ​រាជរដ្ឋាភិបាល​ក្នុង​ការ​អភិវឌ្ឍន៍វិស័យព្រះពុទ្ធសាសនានៅកម្ពុជាឲ្យកាន់តែរីកចម្រើនបន្ថែមទៀត។

លោកជំទាវ​បានបន្តទៀតថា ប្រជាពលរដ្ឋគឺត្រូវខិតខំប្រឹងប្រែងបង្កបង្កើនផល ប្រឹងប្រែងអភិវឌ្ឍមូលដ្ឋាន អាជ្ញាធរមូលដ្ឋាន​ត្រូវខិតខំ​ប្រឹង​ប្រែង​បម្រើសេវាសាធារណៈឲ្យបានល្អ ដោយមិនត្រូវខ្វល់ខ្វាយរឿងអ្នកណាចូលស្រុក ​ឬមិនចូលស្រុកនោះទេ។

លោកជំទាវកិត្តិសង្គហបណ្ឌិត ម៉ែន សំអន បានបួងសួងថ្វាយព្រះពរជ័យថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃគ្រប់ព្រះអង្គ និង ជូនពរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ថ្នាក់ដឹកនាំ សមាជិកព្រឹទ្ធសភា ថ្នាក់ដឹកនាំ សមាជិករដ្ឋសភា ព្រមទាំងប្រជាពលរដ្ឋនៅទូទាំងប្រទេស សូមឲ្យជួបសេចក្តីសុខ សន្តិភាព និង​សេចក្តី​ចម្រើន​គ្រប់ៗគ្នា៕