លោកជំទាវកិត្តិសង្គហបណ្ឌិត ម៉ែន សំអន ជួបសំណេះសំណាលជាមួយកុមារកំព្រា និងបុគ្គលិកនៃមណ្ឌលទាំង១៣ ជិត ១.០០០នាក់ នៅរាជធានីភ្នំពេញ

ថ្លែងក្នុងឱកាសនោះ លោកជំទាវកិត្តិសង្គហបណ្ឌិត ម៉ែន សំអន ក៏បាន​នាំ​នូវ​ការ​ផ្ដាំផ្ញើ​សួរសុខទុក្ខ​ពី​សំណាក់ ​សម្ដេច​តេ​ជោ​នាយករដ្ឋមន្ត្រី និង​​សម្ដេច​កិត្តិ​ព្រឹទ្ធ​បណ្ឌិត ដែល​សម្ដេច​ទាំងពីរ តែងតែ​គិតគូរ​ពី​សុខទុក្ខ ផ្ដល់នូវ​ភាពកក់ក្ដៅ តាមរយៈ​ការជួយឧបត្ថម្ភ​ទាំងសម្ភារៈ ថវិកា គាំទ្រ និង​លើកចិត្ត​ទឹក​ដល់​ក្មួយៗ​កុមារកំព្រា​ទាំងអស់​នៅ​ទូទាំងប្រទេស។ លោកជំទាវបានបន្តទៀតថា ការពិត​ក្មួយៗកំព្រាឪ​ពុកម្តាយ​មែន តែ​ចិត្ត​ក្មួយៗមិន​កំព្រា​ទេ ព្រោះ​ក្មួយៗ​មាន ​សម្ដេច​ទាំងពីរ អាជ្ញាធរ​គ្រប់លំដាប់​ថ្នាក់ ក្រសួងសង្គមកិច្ច អតីតយុទ្ធជន និង​យុវនីតិសម្បទា និង​មន្ទីរ​សង្គមកិច្ច អតីតយុទ្ធជន និង​យុវនីតិសម្បទា រាជធានីភ្នំពេញ តែងតែ​នៅក្បែរ​ក្មួយៗ​ជានិច្ច ដើម្បី​ដោះស្រាយ​ការលំបាក និង​ក្តីកង្វល់​នានា​​របស់​ក្មួយៗ។

លោកជំទាវក៏បានថ្លែងអំណរគុណយ៉ាងជ្រាលជ្រៅចំពោះប្រធានមណ្ឌល បុគ្គលិក និងម៉ែដោះ ដែលបានជួយថែទាំដល់កុមារកំព្រាទាំងអស់ ហើយក៏សូមអរគុណពីការជួយឧបត្ថម្ភគាំទ្រពីវិស័យឯកជន ជាពិសេស ធនាគារអ៊ឹមធីអ៉ិនអែមភឺរ័របែង ដែលបាន ចូលរួមយ៉ាងសកម្ម​ក្នុង​ការងារ​សង្គម និងការងារមនុស្សធម៌នាពេលកន្លងមក ដើម្បីចូលរួមជាមួយរាជរដ្ឋាភិបាលផង ក៏ដូចជាថែរក្សានូវ​អនាគត​ធនធានមនុស្ស​របស់​កម្ពុជាផង។ ជាក់ស្តែងថ្ងៃនេះ ធនាគារអ៊ឹមធីអ៉ិនអែមភឺរ័របែង ក៏បានផ្តល់ជូននូវរបស់របរប្រើប្រាស់ប្រចាំថ្ងៃដល់មណ្ឌលទាំង១៣ រួមមាន ៖ អង្ករ ទឹកត្រី ទឹកស៊ីអ៉ីវ ប្រេងឆា មី និងអំបិល។ ចំណែកឯកុមារម្នាក់ៗទទួលបាន កន្សែងពោះគោ១ ភួយ១ សាប៊ូលុច ១កញ្ចប់ ថ្នាំដុសធ្មេញ ១ប្រអប់ ច្រាសដុសធ្មេញ ១ សាប៊ូកក់សក់ ១ដប និងថវិកាមួយចំនួន និងបុគ្គលិកតាមមណ្ឌលក៏បានទទួលថវិការឧបត្ថម្ភផងដែរ។

លោកជំទាវក៏បានសំណូមពរឲ្យម៉ែដោះ បន្តយកចិត្តទុក្ខដាក់បន្ថែមទៀតក្នុងការជួយថែទាំដល់កុមារកំព្រាទាំងអស់ និងអំពាវនាវដល់ សប្បុរសជន​នានា ក៏ដូចជាវិស័យឯកជនបន្តជួយឧបត្ថម្ភគាំទ្រដល់កុមារកំព្រាទាំងនៅរាជធានីភ្នំពេញ ក៏ដូចជានៅទូទាំងប្រទេសផងដែរ៕