លោកជំទាវកិត្តិសង្គហបណ្ឌិត ម៉ែន សំអន អញ្ជើញបួងសួងនៅប្រាសាទអង្គរវត្ត ខេត្តសៀមរាប

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រី្ត រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បាន​អញ្ជើញចូលបួងសួងនៅប្រាសាទអង្គរវត្ត ខេត្តសៀមរាប កាលព្រឹកថ្ងៃអង្គារ៍ ៣កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវ​នឹងថ្ងៃទី០១ ខែតុលា ឆ្នាំ២០១៩ ។

ឆ្លៀតក្នុងពិធីនោះផងដែរ លោកជំទាវក៏បានជួបសំណេះសំណាលជាមួយ រួមមាន ៖ ឆ្មាំប្រាសាទ អ្នកមគ្គុទ្ទេសទេសចរណ៍ បុគ្គលិកជួសជុល និងថែទាំប្រាសាទ បុគ្គលិករបស់ក្រុមហ៊ុន VGREEN បុគ្គលិកបេតិកភណ្ឌពិភពលោកប្រចាំនៅតំបន់អង្គរ បុគ្គលិករបស់អាជ្ញាធរអប្សារា​ប្រចាំនៅតំបន់អង្គរ បងប្អូនប្រជាពលរដ្ឋ ក្មួយៗកុមារាកុមារី កងកម្លាំងប្រដាប់អាវុធផ្នែកការពារសន្តិសុខសណ្តាប់ធ្នាប់​ប្រចាំការនៅតំបន់នោះ ។ ដោយក្តីអាណិតអាសូរ លោកជំទាវក៏បានឧបត្ថមជូនដល់ស្ត្រីជាអ្នករើសសំបកកំប៉ុង ដែលត្រូវបានប្តីបោះបង់ចោលតាំងពីកូននៅក្នុងផ្ទៃ ដែលបច្ចុប្បន្ននេះទើបតែសម្រាលបាន ៣ខែ។

លោកជំទាវក៏បានផ្តាំផ្ញើ​ឲ្យក្រុមការងារពាក់ព័ន្ធ និងប្រជាពលរដ្ឋទាំងអស់ត្រូវចូលរួមសម្អាតអនាម័យ និងថែរក្សាបរិស្ថានឲ្យបានល្អ ជា​ពិសេស គឺថែទាំប្រាង្គប្រាសាទដែលជាស្នាដៃរបស់បុព្វបុរសរបស់យើងឲ្យនៅគង់វង្សបានល្អ ដើម្បីលើកស្ទួយ​ដល់វិស័យ​ទេសចរណ៍​ធ្វើឲ្យ​ប្រាសាទកាន់តែមានសោភណ្ឌភាព និងមានភាពទាក់ទាញដល់ភ្ញៀវជាតិ ភ្ញៀវអន្តរជាតិឲ្យមកទស្សនាខេត្តសៀមរាប និង​ចូលរួម​ចំណែក​ជាមួយរាជរដ្ឋាភិបាលក្នុងការអភិវឌ្ឍន៍ប្រទេសជាតិ។