លោកជំទាវកិត្តិសង្គហបណ្ឌិត ម៉ែន សំអន បានអំពាវនាវឲ្យប្រជាពលរដ្ឋនៅទូទាំងប្រទេស ត្រូវរួមគ្នាហូបអំបុកទាំងអស់គ្នា នៅថ្ងៃទី៩ ខែវិច្ឆិកា ឆ្នាំ២០១៩
លោកជំទាវកិត្តិសង្គហបណ្ឌិត ម៉ែន សំអន សមាជិកាគណៈអចិន្ត្រៃយ៍ គណៈកម្មាធិការកណ្ដាលប្រធានក្រុមការងារថ្នាក់កណ្ដាលចុះជួយខេត្តស្វាយរៀង អញ្ជើញជាអធិបតីក្នុងឱកាសបិទកិច្ចប្រជុំបូកសរុបលទ្ធផលអនុវត្តភារកិច្ចរបស់ក្រុមការងារគណៈកម្មាធិការកណ្ដាលចុះជួយខេត្តស្វាយរៀង ដំណាក់កាលទី ៧ លើកទី ៣ និងទិសដៅអនុវត្តបន្តដំណាក់កាលទី ៧ លើកទី ៤ នាព្រឹកថ្ងៃសៅរ៍ ៧កើត ខែអស្សុជ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី ០៥ ខែតុលា ឆ្នាំ ២០១៩ នៅខេត្តស្វាយរៀង។
ថ្លែងក្នុងឱកាសនោះ លោកជំទាវបានមានប្រសាសន៍ថា ៖ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំប្រទេសឆ្ពោះទៅរកការអភិវឌ្ឍន៍ និងមានការរីកចម្រើនលើគ្រប់វិស័យទាំងការងាររដ្ឋបាល និងការងារគណបក្ស។ លោកជំទាវបានបន្តទៀតថា សម្រាប់ខេត្តស្វាយរៀងវិញ យើងត្រូវបន្តពង្រឹងនូវការងារកសាងបក្សគ្រប់លំដាប់ ការងារឃោសនាអប់រំ ការងារបណ្តុះបណ្តាលមន្ត្រី ការងារត្រួតពិនិត្យបក្ស ដែលជាការសំខាន់បំផុត ដែលយើងទាំងអស់គ្នាត្រូវយកចិត្តទុកដាក់បន្ថែមទៀត។ លោកជំទាវក៏បានស្នើឲ្យគណៈចលនាសហជីព គណៈចលនាមហាជន គណចៈលនាស្ត្រី គណៈចលនាយុវជន រួមជាមួយអង្គការតូចៗផ្សេង រួមគ្នាធ្វើសកម្មភាពឲ្យបានទាន់ពេលវេលា ដើម្បីឆ្លើយតបនឹងប្រជាពលរដ្ឋនៅមូលដ្ឋាន។
លោកជំទាវបានបន្តទៀតថា ជោគជ័យសព្វថ្ងៃនេះកើតចេញពីការបំពេញការងាររបស់ក្រុមការងារថ្នាក់ជាតិចុះជួយខេត្ត និងក្រុមការងារថ្នាក់មូលដ្ឋាន បានសហការគ្នាបានយ៉ាងល្អក្នុងការបំពេញនូវតម្រូវការ ក៏ដូចជា ការឆ្លើយនឹងសេចក្តីត្រូវការរបស់ប្រជាពលរដ្ឋនៅមូលដ្ឋាន។ ទន្ទឹមនឹងជោគជ័យនោះផងដែរ យើងក៏ត្រូវគិតអំពីបញ្ហាយុវជនបន្តវេន និងត្រូវគិតអំពីការពង្រឹងការកសាងបក្ស រក្សាចាស់បង្កើតថ្មីផងដែរ ដែលជាចំណុចដែលមិនអាចខ្វះបាន។
ឆ្លៀតក្នុងឱកាសនោះផងដែរ លោកជំទាវក៏បានអំពាវនាវឲ្យអាជ្ញាធរគ្រប់លំដាប់ថ្នាក់ កងកម្លាំង សមាជិក សមាជិកា គណបក្សប្រជាជន ប្រជាពលរដ្ឋទាំងអស់គ្នា ត្រូវរួមគ្នាហូបអំបុកទាំងអស់គ្នា នៅថ្ងៃទី៩ ខែវិច្ឆិកា ឆ្នាំ២០១៩ និងចូលរួមឲ្យបានច្រើនកុះករក្នុងព្រះរាជពិធីបុណ្យអុំទូក អកបំបុក និងសំពះព្រះខែ ដែលឈានមកដល់នាពេលខាងមុខនេះ ដើម្បីចូលរួមការពារជាតិ សាសនា និងព្រះមហាក្សត្រ តបតាមការអំពាវនាវរបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
