លោកជំទាវកិត្តិសង្គហបណ្ឌិត ម៉ែន សំអន អញ្ជើញចូលរួមក្នុងពិធីសូត្រមន្តនៃអង្គកឋិនទានសាមគ្គី​ ដើម្បីដង្ហែទៅកាន់​មជ្ឈមណ្ឌលវប្បធម៌​ព្រះពុទ្ធសាសនា​កម្ពុជាគិរីរម្យ

ថវិកា​ដែលបានពីអង្គកឋិនទាននេះ គឺយកទៅកសាងមហាប្រាសាទ​ដ៏ប្រណិតសម្រាប់តម្កល់ព្រះត្រៃបិដក ដែលមានប្រវែង ២៧ម៉ែត្រ x ១០៨ម៉ែត្រ និងកម្ពស់៥៣ម៉ែត្រ ចារគម្ពីរព្រះត្រៃបិដក​ ទ្រទ្រង់ពុទ្ធវចនៈ​លេីថ្មក្រានីត​ ដែលអាចរក្សាទុកបានរាប់ពាន់ឆ្នាំ​ ទុកជាសម្បត្តិបុណ្យ​ ក៏ដូចជា​សម្បត្តិជាតិសម្រាប់គោរពបូជាយូរអង្វែងតទៅ។

អង្គកឋិនទានសាមគ្គីនេះ មានការចូលរួមឧបត្ថម្ភពីសំណាក់ ឯកឧត្តម លោកជំទាវ លោកឧកញ៉ា លោក លោកស្រី មន្ត្រីរាជការ និង​ពុទ្ធបរិស័ទ្ធ ដោយបានមូលមតិគ្នាជាឯកច្ឆ័ន្ទផ្តួចផ្តើមធ្វើអង្គកឋិនសាមគ្គី ដើម្បីផ្សារភ្ជាប់វិស័យអាណាចក្រជាមួយពុទ្ធចក្រ ក្នុងការរួមចំណែកកសាងសមិទ្ធផលនានានៅក្នុងវត្តនៃមូលដ្ឋាននីមួយៗ ដើម្បីលើកស្ទួយវិស័យសាសនា ជាសាសនារបស់រដ្ឋផងដែរ។

ពិធីបុណ្យបានប្រព្រឹត្តទៅបានដោយសាតែប្រទេសជាតិមានសុខសន្តិភាពពេញលេញ និងមានការអភិវឌ្ឍន៍លើគ្រប់វិស័យ ក្រោម​ការ​ដឹកនាំ​ប្រកបដោយកិត្តិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺប្រព្រឹត្តទៅតាមគន្លង ទំនៀមទម្លាប់ប្រពៃណី ព្រះពុទ្ធសាសនា ដោយថ្ងៃដំបូងត្រូវមានពិធីក្រុងពាលី សូត្រមន្ត សម្តែងធម៌ទេសនា និងថ្ងៃបន្ទាប់គឺមានពិធីដង្ហែអង្គ​កឋិនទានជុំវិញព្រះវិហារ និងថ្វាយគ្រឿងសក្ការៈបូជា ថ្វាយចំពោះព្រះពុទ្ធរូបស្នងអង្គព្រះសម្មាសម្ពុទ្ធ ព្រះបរមគ្រូនៃយើង និងបានប្រារព្ធនូវ បទនមស្ការ ព្រះរតនត្រ័យ ថ្វាយបង្គំព្រះ សមាទានសីល ដើម្បីគោរពរំឭកដល់គុណបុណ្យ ព្រះរតនត្រ័យ កែវទាំងបី មានព្រះពុទ្ធ ព្រះធម៌ និងព្រះសង្ឃ ជាកិច្ចបង្ហើយបុណ្យ ៕