លោកជំទាវកិត្តិសង្គហបណ្ឌិត ម៉ែន សំអន ទទួលទានអាហារជាមួយក្រុមការងារសិល្បករ ៣១/១០/២០១៩31/10/2019 401 សិល្បៈ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានជួបដោយចៃដន្យជាមួយ កញ្ញា វង្ស ម៉ាលីន ដែលជាអ្នកចម្រៀងមកពីប្រទេសកាណាដា ទទួលបានជ័យលាភី ១ ផ្នែកចម្រៀងសម័យ កាលពីថ្ងៃទី ២៦ ខែតុលា ឆ្នាំ២០១៩ និងក្រុមការងារ បានទទួលទានអាហាររួមគ្នានៅភោជនីយដ្ឋានសូរិយា នាព្រឹកថ្ងៃព្រហស្បត្តិ៍ ៤កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ៣១ ខែតុលា ឆ្នាំ២០១៩។ ចូលរួមនាពេលនេះផងដែរក៏មានវត្តមានរបស់ លោកជំទាវ ឧកញ៉ា អ៊ឹង ស៊ីស្រ៊ន លោកជំទាវ កងណែម លោក យស់ បូវណ្ណៈ ប្រធានគណៈកម្មការចម្រៀងសាកល និងក្រុមការងារផងដែរ។ លោកជំទាវក៏បានកោតសសើរដល់ កញ្ញា ដែលបានបង្ហាញពីពេទ្យកោសល្យដ៏ប៉ិនប្រសព្វ និងបានបញ្ចេញអស់ពីសមត្ថភាពក្នុងកម្មវិធីមហោស្រពសិល្បៈលើកទី៥ ឆ្នាំ២០១៩ ដែលបានបិទបញ្ចប់កាលពីពេលថ្មីៗទៅនេះ។ លោកជំទាវក៏បានផ្តាំផ្ញើដល់ កញ្ញា វង់ ម៉ាលីន ត្រូវតែខិតខំពង្រឹងសមត្ថភាពខ្លួនបន្ថែមទៀត និងត្រូវចូលរួមថែរក្សា អភិរក្ស និងលើកស្ទួយវិស័យសិល្បៈផ្នែកចម្រៀងសម័យឲ្យនៅគង់វង្សបានល្អ ដើម្បីអភិវឌ្ឍខ្លួន និងរំកិលខ្លួនចូលក្នុងកម្មវិធីរបស់ជាតិ និងអន្តរជាតិ ផ្សេងៗទៀត៕
