អំបុកខ្មែរ ថែជាតិ សាសនា ព្រះមហាក្សត្រ ត្រូវបានប្រារព្ធឡើងនៅរមណីយដ្ឋានប្រវត្តិសាស្រ្តវត្តភ្នំ និង ៨៨៩កន្លែងទៀត នៃរាជធានីភ្នំពេញ
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធី ពិសារអំបុកដើម្បីការពារជាតិ សាសនា ព្រះមហាក្សត្រ នាព្រឹកថ្ងៃព្រឹកថ្ងៃសៅរ៍ ១៣កើត ខែកត្តិក ឆ្នាំកុរ សំរឹទ្ធស័ក ព.ស២៥៦៣ ត្រូវនឹងថ្ងៃទី៩ ខែវិច្ឆិកា ឆ្នាំ២០១៩ នៅរមណីយដ្ឋានប្រវត្តិសាស្រ្តវត្តភ្នំ។
ពិធីពិសារអំបុក គឺត្រូវប្រារព្ធឡើងនៅរមណីយដ្ឋានប្រវត្តិសាស្រ្តវត្តភ្នំ និងតាមមូលដ្ឋាន ភូមិ ឃុំសង្កាត់ និងវត្តអារាមចំនួន ៨៨៩កន្លែង ដែលមានអ្នកចូលរួមប្រមាណជាង ១០ម៉ឺននាក់ នៅក្នុងរាជធានីភ្នំពេញ បានប្រព្រឹត្តទៅក្រោមបរិយាកាសសប្បាយរីករាយបំផុត គឺស្របពេលដែលថ្ងៃនេះ គឺជាថ្ងៃបុណ្យឯករាជ្យជាតិ និងថ្ងៃកំណើតកងទ័ពជាតិនិងត្រៀមអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រារព្ធធ្វើថ្ងៃទី១០-១១-១២ ខែវិច្ឆិកា ខាងមុខនេះ ដែលជាបុណ្យប្រពៃណីជាតិរបស់ប្រជាជនខ្មែរ ដែលមានតាំងពីយូរលង់មកហើយ។
ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី បានទទួលសុខសន្ដិភាពពេញបរិបូរណ៍ និងមានការអភិវឌ្ឍន៍រីកចម្រើនឈានឡើងលើគ្រប់វិស័យ ហើយប្រជាជនទូទាំងប្រទេសកាន់តែមានជីវភាពល្អប្រសើរឡើង មានសុភមង្គល និងមានសិទ្ធិសេរីភាពពេញលេញ ក្នុងជំនឿសាសនា និងការប្រារព្ធពិធីបុណ្យជាតិ ប្រពៃណី និងបុណ្យសាសនាផ្សេងៗយ៉ាងសប្បាយរីករាយ។
ជាក់ស្តែង រាជធានីភ្នំពេញ យើងថ្ងៃនេះបានរៀបចំពិធីពិសារអំបុក ដើម្បីអបអរសាទរថ្ងៃឯករាជ្យជាតិផង និងដើម្បីរួបរួមគ្នាការពារជាតិ សាសនា ព្រះមហាក្សត្រផង។ ទិវានេះមានអត្ថន័យធំធេងណាស់ ព្រោះឱកាសនេះយើងធ្វើឡើង ដើម្បីទប់ស្កាត់ជនក្បត់ជាតិមួយចំនួន ដែលមានបំណងប៉ុនប៉ងផ្តួលរំលំរាជរដ្ឋាភិបាលស្របច្បាប់ និងបង្កចលាចល អសន្តិសុខ និងវិនាសកម្មដល់ប្រទេសជាតិយើង។ ម៉្យាងទៀត ក៏ចង់ក្រឿនរំលឹកដល់យុវជនជំនាន់ក្រោយៗទៀតឲ្យបានយល់កាន់តែច្បាស់ និងស្គាល់អត្តសញ្ញាណជាតិផងដែរ ព្រោះថា យុវជនយើងស្ថិតក្នុងបរិបទសម័យថ្មី យុវជនខ្លះគាត់ទំនើបពេកទៅ គាត់ស្គាល់របៀបអឺរ៉ុបច្រើនជាង ក៏ភ្លេចអត្តសញ្ញាណជាតិ។ ពេលនេះគឺពួកគាត់អាចស្វែងយល់បន្ថែមទៀតអំពីប្រវត្តិ និងប្រពៃណីពីបុរាណរបស់ខ្មែរយើង និងបានស្គាល់អំពីរបៀបដាល់អំបុក ឬក៏ការធ្វើអំបុកកាន់តែច្បាស់។ យើងទាំងអស់គ្នាត្រូវរួមគ្នាថែរក្សា និងអភិរក្សនូវអ្វីដែលជាមរតករបស់ដូនតាខ្មែរឲ្យនៅស្ថិតស្ថេរគង់វង្សផងដែរ។
លោកជំទាវក៏បានអំពាវនាឲ្យប្រជាពលរដ្ឋទាំងអស់គ្នាដោយ «យើងប្រែក្លាយថ្ងៃ៩ ខែវិច្ឆិកា របស់យើង ដែលជាថ្ងៃបុណ្យឯករាជ្យជាតិ ជាថ្ងៃកំណើតកងយោធពលខេមរភូមិន្ទ ឲ្យទៅជាថ្ងៃទី០៩ វិច្ឆិកា ទទួលទានអំបុកទាំងអស់គ្នា អំបុកខ្មែរថែជាតិ សាសនា ព្រះមហាក្សត្រ »។
