លោកជំទាវកិត្តិសង្គហបណ្ឌិត ម៉ែន សំអន ៖ វិស័យពុទ្ធចក្រ និងវិស័យអាណាចក្រ បានចូលរួមចំណែកយ៉ាងសំខាន់ក្នុងការកសាង និងអភិវឌ្ឍប្រទេសជាតិ ១៥/១២/២០១៩ 432 កំពង់ស្ពឺ, ប្រពៃណី-សាសនា លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីបញ្ចុះខណ្ឌសីមា វត្តគន្ធបុប្ផារាម ហៅវត្តអូគគី ស្ថិតក្នុង ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ នាព្រឹកថ្ងៃអាទិត្យ ៤រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ១៥ ខែធ្នូ ឆ្នាំ២០១៩។ ថ្លែងក្នុងឱកាសនោះ លោកជំទាវក៏បានពាំនាំនូវការផ្តាំផ្ញើសាកសួរសុខទុក្ខពី សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់ប្រជាពលរដ្ឋក្នុងពិធីទាំងអស់ ក្នុងមនោសញ្ចេតនានឹករលឹក និងការគិតគូរខ្ពស់ពីជីវភាពរស់នៅរបស់បងប្អូន។ លោកជំទាវ បានបញ្ជាក់ថា៖ ក្រោមការដឹកនាំរបស់រាជរដ្ឋាភិបាលកម្ពុជាដែលមាន សម្ដេចតេជោ ហ៊ុន សែន ជាប្រមុខបានធ្វើឲ្យប្រទេសជាតិ មានសុខ សន្តិភាព និង មានការអភិវឌ្ឈន៍លើគ្រប់វិស័យ ទាំងផ្នែកអាណាចក្រ និងពុទ្ធចក្រ ពិសេសគឺវិស័យព្រះពុទ្ធសាសនាមានការរីកចម្រើន ហើយត្រូវបានរាជរដ្ឋាភិបាលយកចិត្តទុកដាក់ និងលើកតម្កើងកាន់តែខ្លាំងក្លាឡើងថែមទៀត ទុកសម្រាប់ឲ្យប្រជាពលរដ្ឋកម្ពុជា គោរពប្រណិបត្តិ ស្របទៅតាមទំនៀមទំលាប់ប្រពៃណីរបស់ជាតិទៅថ្ងៃអនាគត។ ដោយឡែកខេត្តកំពង់ស្ពឺក៏បានប្រែក្លាយពីតំបន់ដែលមានសង្គ្រាម មកជាតំបន់ដែលជាគោលដៅរបស់អ្នកវិនិយោគគ្រប់ប្រភេទ មានរោងចក្រ សហគ្រាស និងក្រុមហ៊ុនជាច្រើន ដែលបានបង្កើនឱកាសការងារក្នុងស្រុក និងកាត់បន្ថយការធ្វើចំណាកស្រុក និងជួយឲ្យជីវភាពប្រជាពលរដ្ឋខេត្តកំពង់ស្ពឺ កើនឡើងថែមមួយកម្រិតទៀត ។ លោកជំទាវបានធ្វើការកោតសរសើរដល់សប្បុរសជនដែលបានចំណាយធនធានផ្ទាល់ខ្លួន ដើម្បីលើស្ទួយវិស័យពុទ្ធចក្រ ឱ្យមានការរីកចំរើនសម្រាប់ព្រះសង្ឃ ពុទ្ធបរិស័ទ បានធ្វើបុណ្យក្នុងផ្លូវព្រះពុទ្ធសាសនា ដែលជាសាសនារបស់រដ្ឋ។ លោកជំទាវបានចាត់ទុកសមិទ្ធផលនានា ដែល វត្តគន្ធបុប្ផារាម ទទួលបាននាពេលនេះ គឺដោយសារតែប្រទេសជាតិរបស់យើងមានសន្តិភាព ហើយសន្តិភាពនេះហើយ ដែលបានធ្វើឱ្យមានការរីកចំរើន ផ្នែកសេដ្ឋកិច្ច សាសនា និងភាពសុខដុមរមនារបស់ប្រជាពលរដ្ឋទូទាំងប្រទេស។ សូមបញ្ជាក់ថា៖ សមិទ្ធផលនានាក្នុងវត្តរួមមាន ព្រះវិហារថ្មី ដងទង់១គូរ ដែលបានចំណាយថវិកាសាងសង់អស់ចំនួន ៤៥៥.១៦៨$៕
