លោកជំទាវកិត្តិសង្គហបណ្ឌិត ម៉ែន សំអន សំណូមពរឲ្យ លោកស្រី ចាន់ ថន ផ្សព្វផ្សាយបន្តពីការអភិវឌ្ឍន៍របស់កម្ពុជា នៅពេលដែលលោកស្រីត្រលប់ទៅសហរដ្ឋអាមេរិកវិញ ២៥/១២/២០១៩25/12/2019 800 លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានជួបជាមួយ លោកស្រី ចាន់ ថន នៅពេលដែលលោកស្រីព្រមទាំងក្រុមគ្រួសារ បានធ្វើដំណើរមកកំសាន្តមកកាន់ព្រះរាជាណាចក្រកម្ពុជាអំឡុងពេលវិស្សមកាលចុងឆ្នាំ រសៀលថ្ងៃពុធ ១៤រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ២៥ ខែធ្នូ ឆ្នាំ២០១៩ នៅភោជនីយដ្ឋានសូរិយា រាជធានីភ្នំពេញ។ លោកស្រីបាន ចាន់ ថន ដែលជាជនជាតិខ្មែររស់នៅក្រៅប្រទេសបានបង្ហាញពីអារម្មណ៍ភ្ញាក់ផ្អើល ដែលនេះជាលើកដំបូង ហើយដែលលោកស្រីបានមកដល់មាតុប្រទេសវិញ គ្រាដែលលោកស្រីបានចាកចេញពីប្រទេសទៅរស់នៅសហរដ្ឋអាមេរិក អស់រយៈពេលជាង ២០ឆ្នាំ។ លោកស្រីបានមើលឃើញថា កម្ពុជាបច្ចុប្បន្នមានការរីកចម្រើនខ្លាំង មានហេដ្ឋារចនាសម្ព័ន្ធខ្វាត់ខ្វែង សំណង់អគារខ្ពស់ៗ សុខសុវត្ថិភាព និងមានស្ថេរភាពនយោបាយល្អ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ វាផ្ទុយស្រឡះពីអ្វីដែលប្រជាពលរដ្ឋខ្មែរនៅក្រៅប្រទេសមួយចំនួន បាននិយាយថា កម្ពុជាមិនមានស្ថេរភាពនោះទេ។ លោកស្រីបានបន្តទៀតថា ខ្ញុំវង្វេងអស់ហើយ មិនបានចាំថាកន្លែងណា ជាកន្លែងណានោះទេ ពីព្រោះវាបានផ្លាស់ប្តូរអស់ហើយ ពីស្ងាត់ជ្រងំ មកជាអ៊ូរអរ និងមានមនុស្សច្រើនណាស់ ក្រុមហ៊ុន រោងចក្រ សហគ្រាសជាច្រើនដែលបាននឹងកំពុងដំណើរការជាហូរហែរ។ លោកជំទាវកិត្តិសង្គហបណ្ឌិត ក៏បានថ្លែងអំណរគុណដល់លោកស្រី ចាន់ ថន ដែលមើលឃើញអំពីការអភិវឌ្ឍន៍ប្រទេស និងបានសំណូមពរឲ្យលោកស្រីធ្វើការផ្សព្វផ្សាយបន្តដល់ប្រជាជនខ្មែនៅក្រៅប្រទេស ក៏ដូចជាជនបទេស នៅពេលដែលត្រលប់ទៅដល់សហរដ្ឋអាមេរិកវិញ ដើម្បីទាក់ទាញភ្ញៀវទេសចរណ៍មកទស្សនាកម្ពុជាឲ្យបានកាន់តែច្រើនបន្ថែមទៀត ក៏ដូចជាចូលរួមចំណែកជាមួយរាជរដ្ឋាភិបាលក្នុងការងារអភិវឌ្ឍន៍ប្រទេស។
