លោកជំទាវកិត្តិសង្គហបណ្ឌិត ម៉ែន សំអន អញ្ជើញជាអធិបតីក្នុងពិធីសន្និបាតបូកសរុបលទ្ធផលការងារ និងពិធីប្រកាសទទួលស្គាល់ ការកែរសម្រួល និងបំពេញបន្ថែមសមាសភាពថ្នាក់ដឹកនាំសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ និងគណៈចលនាស្រ្តីខេត្តកំពង់ចាម

ឆ្លៀតក្នុងឱកាសនោះ លោកជំទាវក៏បានថ្លែងអំណរគុណចំពោះ ឯកឧត្តម ប្រធានគណបក្សប្រជាជនកម្ពុជាខេត្ត អភិបាលនៃគណៈអភិបាលខេត្ដ ក្រុមការងារ និងថ្នាក់ដឹកនាំខេត្តទាំងអស់ ដែលបានយកចិត្តទុកដាក់និងជួយឧបត្ថម្ភ គាំទ្រ ដល់សកម្មភាពរបស់សមាគមនារី និងក្រុមចលនាស្ត្រីកន្លងមក ។

នៅក្នុងពិធីប្រកាសកែរសម្រួលនោះ លោកជំទាវ ញូង ចរិយា ក៏ត្រូវបានតែងតាំងជាប្រធានកិត្តិយស សាខាសមាគមន៍នារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ចាម និងលោកជំទាវ ប៉ាង ដានី ត្រូវបានតែងតាំងជាប្រធានគណៈចលនាស្រ្តីខេត្តកំពង់ចាម រួមជាមួយសមាជិការមួយចំនួនទៀត ក៏បានបំពេញបន្ថែមនៅក្នុងរចនាសម្ព័ន្ធផងដែរ។

លោកជំទាវកិត្តិសង្គហបណ្ឌិត ម៉ែន សំអន បានផ្តាំផ្ញើ​ឲ្យលោកជំទាវ និងថ្នាក់ដឹកនាំ​ដែលបានតែងតាំង​ក្នុងថ្ងៃនេះ ត្រូវអនុវត្តតាមតួនាទី​ភារកិច្ច​របស់ខ្លួនប្រកបដោយប្រសិទ្ធិភាពខ្ពស់ ដោយផ្តោតជាសំខាន់លើការងារកសិកម្ម សុខាភិបាល អប់រំ និងវិស័យផ្សេងៗទៀត​ដែល​ជា​វិស័យ​អាទិភាព ដើម្បីចូលរួមចំណែកអភិវឌ្ឍន៍ខេត្តកំពង់ចាម ក៏ដូចជារួមចំណែកក្នុងការអភិវឌ្ឍប្រទេសជាតិ។