លោកជំទាវកិត្តិសង្គហបណ្ឌិត ម៉ែន សំអន អញ្ជើញជាអធិបតី​ក្នុង​ពិធី​ខួប​អនុស្សាវរីយ៍លើកទី១០៩ នៃទិវា​អន្តរជាតិ​នារី ៨ មីនា ក្រោមប្រធានបទ “មានសន្តិភាព មានការ​លើក​កម្ពស់​សមភាពយេនឌ័រ” នៅក្រសួងផែនការ

ថ្លែងក្នុងឱកាសនៃពិធីអបអរសាទរនោះ លោកជំទាវកិត្តិសង្គហបណ្ឌិត បានមានប្រសាសន៍ថា ៖ ប្រធានបទឆ្នាំនេះគឺពិតជា មានសារៈសំខាន់ណាស់ព្រោះ កត្តាសុខសន្តិភាពពិតជាសំខាន់ណាស់ ក្នុងការចូលរួមចំណែកអភិវឌ្ឍន៍ប្រទេសជាតិ មានសុខសន្តិភាព គឺយើងមានអ្វីៗទាំងអស់ និងមានការលើកម្ពស់សមភាពយេនឌ័រ ដែលយើងទាំងអស់គ្នាបានប្រារព្ធពិធីអបអរនាពេលនេះ។

លោកជំទាវក៏បានរំលឹកអំពីប្រវត្តិចលនាតស៊ូជាបន្តបន្ទាប់របស់នារីនៅលើពិភពលោក ទាមទារឲ្យមានការគោរពសិទ្ធិស្ត្រីនៅក្នុងសង្គម និងសិទ្ធិក្នុងការចូលរួមបោះឆ្នោតរហូតទទួលបានជោគជ័យ ហើយអង្គការសហប្រជាជាតិបានបញ្ចូលប្រធានបទនេះជាផ្លូវការ ទិវាអន្តរជាតិ ៨ មីនា ដែលត្រូវបានប្រទេសសមាជិកប្រារព្ធពិធីអបអរសាទរជារៀងរាល់ឆ្នាំ។

លោកជំទាវក៏បានវាយតម្លៃខ្ពស់ចំពោះលក្ខណៈសម្បត្តិនារីកម្ពុជាប្រកបដោយសមត្ថភាព ដោយស្មារតីទទួលខុសត្រូវ និងអំណត់តស៊ូ​ព្យាយាមគ្រប់ការងារ និងគ្រប់កាលៈទេសៈ ដែលបានចូលរួមតស៊ូយ៉ាងសកម្មក្នុងសម័យសង្គ្រាម កាលពីអតីតកាល ក្នុងការការពារ​ទប់ស្កាត់នូវការវិលត្រលប់មកវិញនៃរបប ប៉ុល ពត រហូតមកដល់បច្ចុប្បន្ន ដែលមានតម្លៃជាសាកល ពោលគឺស្ត្រីជាកម្លាំង​ចលករ​ជំរុញ​កិច្ចអភិវឌ្ឍគ្រួសារ និងអភិវឌ្ឍខឿនសេដ្ឋកិច្ចជាតិ។ ហេតុដូច្នេះហើយ ទើបរាជរដ្ឋាភិបាលដែលមានសម្ដេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញជាផែនការយុទ្ធសាស្ត្រ ក៏ដូចជាអនុសាសន៍ផ្សេងៗ ដើម្បីសំដៅ​លើកកម្ពស់​នារីនៅតាមស្ថាប័ន ក្រសួង មន្ទីរ គ្រប់អង្គភាពសាធារណៈ ក្នុងគោលបំណងជំរុញការចូលរួមរបស់ស្ត្រី ដើម្បីអភិវឌ្ឍន៍សេដ្ឋកិច្ចជាតិ និងសង្គមជាតិ។

លោកជំទាវក៏បានសំណូមពរឲ្យ៖

ទី១.មន្ត្រីរាជការនៃក្រសួងផែនការទាំងអស់ ពិសេស នារីដែលទទួលបានការលើកទឹកចិត្តពីសំណាក់រាជរដ្ឋាភិបាល ក៏ដូចជាថ្នាក់ដឹកនាំក្រសួងក្នុងការតែងតាំង ត្រូវចេះសាមគ្គីភាពគ្នា ពិសេស គឺអនុវត្តតាមអនុសាសន៍របស់សម្តេចតេជោ ១១ចំណុច ក្នុងពិធីបិទកិច្ចប្រជុំប្រចាំឆ្នាំរបស់ក្រុមប្រឹក្សាជាតិកម្ពុជាដើម្បីស្ត្រី ដែលពាក់ព័ន្ធនឹងក្រសួងផែនការ។

ទី២.ត្រូវអនុវត្តនូវទិសស្លោក អរគុណសន្តិភាព ដោយមានការចូលរួមមន្រ្តីរាជការយើងទាំងអស់គ្នា។

ទី៣.ប្តេជ្ញាដោះស្រាយនូវរាល់បញ្ហាដែលក្រសួងផែនការបានដាក់ចេញ៕