លោកជំទាវកិត្តិសង្គហបណ្ឌិត ម៉ែន សំអន តំណាងដ៏ខ្ពង់ខ្ពស់ សម្តេច​​តេជោ​នាយករដ្ឋមន្ត្រី អញ្ជើញជា​អធិបតី​ក្នុង​ពិធី​ប្រកាសផ្ទេរ និង ចូលកាន់ដំណែង រដ្ឋមន្ត្រីក្រសួងធម្មការ និង សាសនា

ឆ្លៀតក្នុងឱកាសនោះ លោកជំទាវក៏បានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ជូនដល់អង្គពិធីនូវក្តីនឹករលឹក និងបានកោតសសើរដល់ ឯកឧត្តម ហ៊ឹម ឆែម ដែលបានដឹកនាំស្ថាប័នកន្លងមកសម្រេចបានលទ្ធផលគួរជាទីមោទនៈ តាមរយៈសកម្មភាពនានា ការរៀបចំបង្កើតឲ្យមានកម្មវិធីជាច្រើន ក្នុងនោះកម្មវិធី នាទីព្រះពុទ្ធសាសនាផ្សារភ្ជាប់នឹងសង្គម និងកម្មវិធីទស្សនាទានព្រះពុទ្ធសាសនា បានសម្តែងធម្មទេសនា និងការអប់រំដល់ពុទ្ធបរិស័ទ មន្ត្រីរាជការ និស្សិត សិស្សានុសិស្សមកពីគ្រឹះស្ថានអប់រំនានា ចូលរួមស្តាប់ និងសាកសួរ ដើម្បីបញ្ជ្រាបការអប់រំឲ្យផ្លូវចិត្តឲ្យមានការស្ងប់ស្ងាត់ល្អ រួមជាមួយនឹងការបណ្តុះបណ្តាលតួនាទី ភារកិច្ច និងក្រមសីលធម៌អាចារ្យ អាចារ្យរិនី ខ្មែរផងដែរ ដោយបានធ្វើការចាក់ផ្សាយតាមស្ថានីយ៍វិទ្យុ និងទូរទស្សន៍ រដ្ឋ និងឯកជនផងដែរ។

លោកជំទាវក៏បានបន្តទៀតថា ក្នុងស្ថានភាពបច្ចុប្បន្នដែលមានការឆ្លង និងរាតត្បាតដោយជំងឺកូវីដ-១៩ នៅទូទាំងពិភពលោក ក៏បានឲ្យថ្នាក់ដឹកនាំគ្រប់លំដាប់ថ្នាក់នៃក្រសួងធម្មការ និងសាសនា ត្រូវយកចិត្តទុកដាក់ខិតខំផ្សព្វផ្សាយឱ្យសាសនិក គ្រប់សាសនាទាំងអស់ចូលរួមបង្ការ ទប់ស្កាត់ ការរីករាលដាលនៃជំងឺ Covid-19 តាមការណែនាំរបស់រាជរដ្ឋាភិបាល ក្រសួងសុខាភិបាល និងក្រសួងមហាផ្ទៃ។

ដើម្បីចូលរួមចំណែកក្នុងការអភិវឌ្ឍន៍ក្រសួងធម្មការ និងសាសនា ឲ្យកាន់តែមានប្រសិទ្ធភាពបន្ថែមទៀត លោកជំទាវក៏បាន ផ្តល់អានុសាសន៍ដូចតទៅ ៖

ទី១. ឯកឧត្តមរដ្ឋមន្ត្រីត្រូវដឹកនាំក្រសួង ដោយប្រកាន់យកភាពម្ចាស់ការ ឯករាជ្យភាព តម្លាភាព គណនេយ្យភាព និងអនុវត្តយ៉ាងខ្ជាប់ខ្ជួនតាមតួនាទីស្នូលរបស់ក្រសួងរួមចំណែកជួយដល់រាជរដ្ឋាភិបាល។

ទី២. ឯកឧត្តម លោកជំទាវ ជារដ្ឋលេខាធិការ ត្រូវពង្រឹងសាមគ្គីភាពផ្ទៃក្នុង អនុវត្តការងារតាមច្បាប់ និងលិខិតបទដ្ឋានរបស់រាជរដ្ឋាភិបាល និងបន្តកសាងគោលការណ៍នានាទាក់ទងការពង្រឹងស្ថាប័ន។

ទី៣. ត្រូវពង្រឹងស្ថាប័ន ពង្រឹងមន្ត្រីរាជការ តាមរយៈបាវចនា ២ គឺ៖ កែទម្រង់ខាងក្នុង បង្កើនមិត្តខាងក្រៅ ក្នុងស្មារតីឯករាជ្យ និងការអនុវត្តអភិក្រមទាំង៥ របស់សម្តេចតេជោ គឺ៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់៕