លោកជំទាវកិត្តិសង្គហបណ្ឌិត ម៉ែន សំអន បានទទួលអំណោយសប្បុរសធម៌ពីមូលនិធិក្រុមគ្រូពេទ្យចិត្តសប្បុរសប៉ាយសូយឡាវយិនកម្ពុជា និងក្លិបចំនួន៣ទៀត សម្រាប់ចូលរួមក្នុងសកម្មភាពមនុស្សធម៌ខេត្តស្វាយរៀង

ឆ្លៀតក្នុងឱកាសនោះផងដែរ លោកជំទាវ បានពាំនាំ​នូវការផ្តាំផ្ញើសួរសុខទុក្ខពីសំណាក់ សម្តេច​អគ្គមហា​សេនា​បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះឯកឧត្តម លោកជំទាវ លោក លោកស្រី និងក្រុមការងារទាំងអស់នូវក្តីនឹករលឹក ដែលមានវត្តមានក្នុងពេលនេះ។

លោកជំទាវក៏បានបន្តទៀតថា ស្ថិតនៅក្នុងស្ថានភាពដ៏លំបាក ដែលនៅលើពិភពលោកបាននឹងកំពុងរួមគ្នាប្រយុទ្ធប្រឆាំងនឹងមេរោគកូវីដ១៩ ក៏មានមិត្តជាច្រើនបានជួយដល់រាជរដ្ឋាភិបាលកម្ពុជា។

ប៉ុន្តែពេលនេះវត្តមានរបស់មូលនិធិក្រុមគ្រូពេទ្យចិត្តសប្បុរសប៉ាយសួយឡាវយិនកម្ពុជា និងក្លិបទាំងបីទៀត ក៏បានបរិច្ចាកនូវអំណោយមនុស្សធម៌ជួយដល់ប្រជាពលរដ្ឋក្នុងខេត្តស្វាយរៀងចំនួន ១,០០០គ្រួសារ ក្នុងនោះរួមមាន ៖ ១. អង្ករ ២០តោន ២. មី ១.០០០កេស ៣. ស្ករស ១តោន ៤. អំបិល ១តោន និង ៥. ទឹកត្រី ១.០០០ដប។

លោកជំទាវក៏បានថ្លែងអំណរគុណដល់សប្បុរសជនទាំងអស់ទទួលបាននូវជោគជ័យគ្រប់ភារកិច្ច និងសូមបន្តនូវប្រពៃណីចែករំលែក​នេះ​បន្តទៀត ដើម្បីបានចូលរួមចំណែកជួយដល់រាជរដ្ឋាភិបាលកម្ពុជា ក៏ដូចជាខេត្តស្វាយរៀងផងដែរ ដោយផ្តោតជាសំខាន់លើស្រ្តី និងកុមារ៕