លោកជំទាវកិត្តិសង្គហបណ្ឌិត ម៉ែន សំអន ប្រគេន​ទៀន​ព្រះវស្សា និង​ទេយ្យទាន​ដល់​ព្រះសង្ឃ​គង់ចាំ​ព្រះវស្សា ចំនួន ០៨វត្ត នៅ​ខេត្ត​កណ្តាល

លោកជំទាវក៏បានផ្តាំផ្ញើសួរសុខទុក្ខដោយក្តីនឹករលឹកពីសំណាក់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ជូនបងប្អូនប្រជាពលរដ្ឋទាំងអស់នៅទូទាំងខេត្តស្វាយរៀង ដោយសម្តេចទាំងទ្វេរតែងតែគិតគូរខ្ពស់ចំពោះជីវភាពប្រចាំថ្ងៃរបស់ប្រជាពលរដ្ឋ។

ក្នុងពិធីនោះដែរ លោកជំទាវក៏បានមានប្រសាសន៍លើកឡើងថា ការប្រារព្ធធ្វើពិធីនេះឡើងបាន ដោយសារប្រទេសជាតិមានសុខសន្តិភាព ជាពិសេស បង្ហាញពីទឹកចិត្តរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត គោរពស្រឡាញ់ប្រណិបត្តិព្រះពុទ្ធសាសនា ជាសាសនារបស់រដ្ឋ ដើម្បីថែរក្សាការពារវិស័យព្រះពុទ្ធសាសនា ឱ្យកាន់តែមានភាពរុងរឿងនិងរីកចម្រើន។

លោកជំទាវក៏បានក្រើនរំលឹកដល់ប្រជាពលរដ្ឋកម្ពុជាគ្រប់រូបត្រូវគោរព និងអនុវត្តឲ្យបានខ្ជាប់ខ្ជួននូវគោលការណ៍រក្សាគម្លាតសង្គម និងវិធានការនានាតាមការកំណត់របស់ក្រសួងសុខាភិបាល និងត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជម្ងឺកូវីដ១៩ នៃរលកទី២ ខណៈពេលដែលពិភពលោកកំពុងប្រឈមមុខនឹងការរាត្បាតយ៉ាងខ្លាំងដោយសារជម្ងឺមួយនេះ។

លោកជំទាវបានផ្តាំផ្ញើឲ្យប្រជាពលរដ្ឋទាំងអស់គ្នាត្រូវបង្កើនការផលិតផ្នែកកសិកម្មតាមរយៈការដាំដុះ ការចិញ្ចឹមសត្វ ជាដើម ចំណែកឯអាជ្ញាធរត្រូវតែពង្រឹងឲ្យមានប្រសិទ្ធិភាពនូវភូមិ-ឃុំមានសុវត្ថិភាព និងចូលរួមគោរពច្បាប់ចរាចរណ៍ទាំងអស់គ្នា។

ទៀនព្រះវស្សា ទេយ្យវត្ថុ របស់លោកជំទាវកិត្តិសង្គហបណ្ឌិត ម៉ែន សំអន លោកឧកញ៉ា ផែរ ហុកឈួន និង លោកជំទាវឧកញ៉ា អ៊ឹង ស៊ីស្រ៊ន ឧបាសិកា តាំង បាក់ ហៀង ព្រមទាំងពុទ្ធិស័ទ្ធចំណុះជើងវត្ត បានប្រគេន ០៨វត្ត រួមមាន ៖ បច្ច័យមួយចំនួន ទៀនព្រះវស្សា ១គូរ ផ្ទិល ១ ប្រេង ៣០លីត្រ អង្ករ ៥០គីឡូក្រាម មីម៉ាម៉ា ១កេសធំ ទឹកក្រូច ៥កេស ទឹកសុទ្ធ ៥កេស ទឹកដោះគោ ១កេស ស្ករ ស ២៥គីឡូក្រាម តែស្លឹក ២គីឡូក្រាម ទឹកត្រី ១ឡូ ទឹកស៊ីអ៊ីវ ១កេស អំបិល ១០គីឡូក្រាម ត្រីខ ១កេស ត្រីងៀត ត្រីហើម ៥គីឡូក្រាម សាច់ក្រក ២គីឡូក្រាម នំ អេបីស៊ី ១ធុង ផ្លែឈើ ១កន្ត្រក គ្រាប់ស្វាយចន្ទី ២គីឡូក្រាម ម្ស៉ៅស៊ុប ១ដុំ និងបានចែកទៀនដល់ប្រជាពលរដ្ឋជាង ២០០នាក់ ដោយក្នុងម្នាក់ទទួលបាន សារ៉ុង ១ និងថវិកាមួយចំនួន។