ឯកឧត្តម សុឹម ស៊ូយុង ដឹកនាំប្រតិភូចូលរួមប្រជុំពិភាក្សារកដំណោះស្រាយករណីរំលោភយកដីលំនៅដ្ឋាន ស្ថិតនៅសង្កាត់កំពង់ស្វាយ ០២/១០/២០២០10/10/2020 408 បន្ទាយមានជ័យ, ឯកឧត្តម សុឹម ស៊ូយុង បន្ទាយមានជ័យ, ថ្ងៃព្រហស្បត្តិ៍ ទី០១ ខែតុលា ឆ្នាំ២០២០ ឯកឧត្តម សុឹម ស៊ូយុង អនុរដ្ឋលេខាធិការ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានដឹកនាំប្រតិភូ ចូលរួមប្រជុំពិភាក្សារកដំណោះស្រាយជាមួយលោក លី សារី អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ ករណីពាក្យស្នេីសុំអន្តរគមន៍របស់លោកស្រី រិទ្ធ សុគន្ធា រស់នៅភូមិចំការតាដោក ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ប្តឹងលោកមេឃុំកំពង់ស្វាយ និងលោកអនុប្រធានសាសនាគ្រឹស្គ ដែលបានក្លែងបន្លំឯកសារ ដេីម្បីរំលោភយកដីលំនៅដ្ឋានរបស់គាត់ទំហំ ២៩ម៉ែត្រ x ៣០ម៉ែត្រ មានទីតាំងស្ថិតនៅភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ បញ្ហាដីធ្លីខាងលេីមានភាពស្មុគស្មាញច្រេីន និងបានអូសបន្លាយតាំងពីចុងឆ្នាំ២០០៧ មកម្ល៉េះ គណៈប្រតិភូដែលដឹកនាំដោយ ឯកឧត្តម សុឹម ស៊ូយុង បានបេីកកិច្ចប្រជុំក្នុងន័យបញ្ចប់រឿងនេះ។ ក្រោយពីកិច្ចប្រជុំពិភាក្សារកដំណោះស្រាយនេះ លោកអភិបាលរងខេត្តបន្ទាយមានជ័យ បានអោយដឹងថា ប្រសិនបេីលោកស្រី រិទ្ធ សុគន្ធា ព្រមបញ្ចប់នូវបញ្ហានេះ រដ្ឋបាលខេត្តបន្ទាយមានជ័យ នឹងធ្វេីការផ្តល់ជូនគាត់នូវដីស្រែ ១ហិកតា ដីលំនៅដ្ឋាន ៣០ម៉ែត្រ x ៥០ម៉ែត្រ និងផ្ទះ ១ខ្នង ទំហំ៤មែត្រ x ៦មែត្រ ដែលមានទីតាំងនៅតំបន់២២២២ នៃស្រុកភ្នំស្រុក។
