លោកជំទាវ ម៉ែន សំអន ទទួលជួបជាមួយគណៈប្រតិភូសហព័ន្ធយុវជនទូទាំងប្រទេសចិន
លោកជំទាវកិត្តិសង្គបណ្ឌិត ម៉ែនសំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយ រដ្ឋសភា-ព្រឹទ្ធសភា និងអធិការកិច្ច បានទទួលជួបជាមួយគណៈប្រតិភូសហព័ន្ធយុវជនទូទាំង ប្រទេសចិន ដែលដឹកនាំដោយ ឯកឧត្ដម ហើ ជុនកិ (He Junke) បានសំដែងការគួរសម និងពិភាក្សាការងារ នៅទីស្តីការក្រសួង
នាព្រឹកថ្ងៃអង្គារ៍ ២កើត ខែភទ្របទ ឆ្នាំ ច សំរិទ្ធិស័ក ព.ស.២៥៦២ ត្រូវនឹងថ្ងៃទី១១ ខែកញ្ញា ឆ្នាំ២០១៨។
ថ្លែងក្នុងឱកាសនោះ លោកជំទាវក៏បានលើកឡើងអំពីទំនាក់ទំនងមិត្តភាព កម្ពុជាចិនមានប្រវត្តិដ៏យូរលង់តាំងពីបុរាណកាលមកជា ពិសេស រវាងអតីតអ្នកដឹកនាំនៃប្រទេសទាំងពីរ គឺសម្តេចនរោត្តម សីហនុ និងឯកឧត្តមប្រធាន ម៉ៅ សេទុង រួមទាំងបណ្តាថ្នាក់ដឹកនាំកំពូលៗ នៃប្រទេសទាំងពីរ ក្នុងជំនាន់ក្រោយៗ ដែលបានបន្តថែរក្សាមត៌កនេះ ហើយខិតខំពូនជ្រុំចំណងមហាមិត្តភាពកម្ពុជាចិន ឱ្យបន្តរីកចម្រើនឥត ឈប់ឈរ ពីដំណាក់កាលមួយទៅដំណាក់កាលមួយ និងបានឈានរហូតមកដល់សព្វថ្ងៃ។
លោកជំទាវបានបន្តទៀតថា, ប្រទេសទាំងពីរ(កម្ពុជា-ចិន) បានគាំទ្រគ្នាទៅវិញទៅមក ដោយជំនះបានគ្រប់ឧបសគ្គដើម្បីសុខសន្តិភាព និងវិបុលភាព។ កម្ពុជាតែងតែប្រកាន់ខ្ជាប់នូវគោលនយោបាយគាំទ្រចិនតែមួយ។ កម្ពុជាសូមអបអរសាទរជាមួយនឹងការរីកលូតលាស់ឥតឈប់ឈរនៃសង្គមសេដ្ឋកិច្ច របស់ចិន ដែលបានក្លាយជាប្រទេសមហាអំណាចសេដ្ឋកិច្ចទី២ លើពិភពលោក និងសូមសរសើរប្រទេសចិនដែលបាន ដើរតួនាទីយ៉ាងសំខាន់ជាក្បាល ម៉ាស៊ីនសេដ្ឋកិច្ច សម្រាប់អូសទាញសេដ្ឋកិច្ចពិភពលោកទាំងមូល និងជាតុល្យភាពអំណាចមួយដ៏រឹងមាំ ដើម្បីរក្សាសន្តិភាពក្នុពិភពលោក។
ជាមួយគ្នានោះដែរកម្ពុជាសូមថ្លែងអំណរ គុណយ៉ាងជ្រាលជ្រៅ ចំពោះគុណបំណាច់ដ៏ធំធេងរបស់បក្សកុម្មុយនិស្តចិន ប្រជាជន និងរដ្ឋាភិបាលចិន ដែលបានជួយឧបត្ថម្ភដល់កម្ពុជា តាមរយៈ ការផ្តល់ជំនួយឥតសំណង និងប្រាក់កម្ចីសម្បទាន ក្នុងដំណាក់កាលដែលកម្ពុជាត្រូវការជំ នួយដើម្បីកសាង និងអភិវឌ្ឍន៍ប្រទេស រួមមាន៖ វិស័យហេដ្ឋារចនាសម្ព័ន្ធ ផ្លូវថ្នល់ ស្ពាន ឋាមពល ធារាសាស្ត្រ កសិកម្ម ពាណិជ្ជកម្ម និងសង្គមកិច្ច ជាដើម។
លើសពីនេះចិនបានបញ្ជូនអ្នកវិនិយោគ និងអ្នកទេសចរណ៍ មកធ្វើពាណិជ្ជកម្ម និងមកទស្សនាកម្ពុជាផងដែរ។