លោកជំទាវកិត្តិសង្គហបណ្ឌិត ម៉ែន សំអន បានអញ្ជើញជាអធិបតីក្នុងពិធីបើកសម្ភោធជាផ្លូវការរបស់សមាគមស្បែកជើងកម្ពុជា

លោកជំទាវ បានមានប្រសាសន៍ថា ក្រោមការដឹកនាំប្រកបដោយកិត្តិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសកម្ពុជា មានសុខសន្តិភាពយ៉ាងពេញលេញ មានស្ថិរភាពនយោបាយនឹងនរ មានការអភិវឌ្ឍន៍រីកចម្រើនជឿនលឿនលើគ្រប់វិស័យ។

លោកជំទាវ បានគាំទ្រយ៉ាងពេញទំហឹង និងថ្លែងកោតសសើរចំពោះ លោកឧកញ៉ា លី ឃុនថៃ ជាប្រធានសមាគម ដែលមានការប្តេជ្ញា​ចិត្ត​ខ្ពស់ ជាមួយទស្សនៈវិស័យដ៏ច្បាស់លាស់ បានរួមគ្នាបង្កើតសមាគមមួយនេះឡើង ដើម្បីសម្របសម្រួលរវាងគ្រប់ភាគីពាក់ព័ន្ធទាំងក្នុង និង​ក្រៅប្រទេស នៃវិស័យឧស្សាហកម្មផលិតស្បែកជើងនៅក្នុងប្រទេសកម្ពុជា ក្នុងការពារផលប្រយោជន៍សមាជិកផង និងដើម្បីរួមចំណែក​អភិវឌ្ឍន៍​វិស័យផលិតកម្មស្បែកជើងផង។

លោកជំទាវបានលើកទឹកចិត្តដល់ លោកឧកញ៉ា លី ឃុនថៃ សមាជិក និងសមាជិកានៃសមាគម ចូលរួមឲ្យកាន់តែសកម្ម ក្នុងការងារសង្គម និងសកម្មភាពមនុស្សធម៌នានា ព្រមទាំងចូលរួមលើកស្ទួយវិស័យឧស្សាហកម្មផលិតស្បែកជើងនៅប្រទេសកម្ពុជាឲ្យកាន់តែមានភាពរឹងមាំ ប្រកបដោយគុណភាព និងមានលទ្ធភាពគ្រប់គ្រាន់ក្នុងការប្រកួតប្រជែងលើទីផ្សារអន្តរជាតិ រួមចំណែកជំរុញកំណើនសេដ្ឋកិច្ចកម្ពុជាឱ្យ​មាន​សន្ទុះខ្លាំងឡើងជាលំដាប់។