លោកវរសេនីយឯក ម៉ៅ រ៉ាន្នី តំណាងដ៏ខ្ពង់ខ្ពស់លោកជំទាវកិត្តិសង្គហបណ្ឌិត ម៉ែន សំអន បាននាំយកអំណោយដ៏ថ្លៃថ្លារបស់លោកជំទាវចែកជូនកុមារ អេស អូ អេស ក្រចេះ

ក្នុងពិធីនោះផងដែរ ក៏មានការអញ្ជើញចូលរួមពីសំណាក់លោក ស៊ីន ប៊ុនធឿន ប្រធានភូមិ កុមារ អេស អូ អេស ក្រចេះ លោក ចាន់ សុគុណ ប្រធានមន្ទីរសង្គមកិច្ចអតីតយុទ្ធជននិងយុវនីតិសម្បទា ខេត្តក្រចេះ លោកគ្រូ អ្នកគ្រូ បុគ្គលិកថែទាំកុមារ សរុបចំនួន ១០៦ នាក់។

ថ្លែងក្នុងឱកាសនោះ លោកវរសេនីយឯក ម៉ៅ រ៉ាន្នី ក៏បាននាំមកនូវការផ្តាំផ្ញើសាកសួរសុខទុក្ខពីសំណាក់ លោកជំទាវកិត្តិសង្គហបណ្ឌិត ម៉ែន សំអន ជូនដល់ក្មួយៗ និងបុគ្គលិកថែទាំទាំងអស់ដោយក្តីនឹករលឹក។ លោកបានបន្តទៀតថា ប្អូនៗត្រូវខិតខំរៀនសូត្រ និងត្រង់ត្រាប់​ស្តាប់​ការបង្ហាត់បង្រៀនរបស់លោកគ្រូ អ្នកគ្រូ និងធ្វើជាក្មេងល្អ ដើម្បីអភិវឌ្ឍន៍ខ្លួនក្លាយជាយុវជនបន្តវេនរបស់ប្រទេសជាតិ។ បន្ទាប់មកទៀត លោកវរសេនីយឯក ម៉ៅ រ៉ាន្នី ក៏បាននាំយកនូវអំណោយដ៏ថ្លៃថ្លារបស់ លោកជំទាវកិត្តិសង្គហបណ្ឌិត ម៉ែន សំអន ទៅចែកជូនដល់កុមារ បុគ្គលិកថែទាំកុមារទាំងអស់ រួមមាន ៖ នំ ទឹកសុទ្ធ ទឹកក្រូច ទឹកផ្លែឈើ សាំងវិច និងថវិកាមួយចំនួន។

ជាការឆ្លើយតបក្នុងនាមអ្នកគ្រប់គ្រង និងកុមារទាំងអស់បានបង្ហាញអំពីការរំភើប និងសប្បាយរីករាយ និងថ្លែងអំណរគុណ​យ៉ាងជ្រាលជ្រៅ​ចំពោះទឹកចិត្តដ៏ថ្លៃថ្លារបស់លោកជំទាវ និងគោរពជូនពរ លោកជំទាវកិត្តិសង្គហបណ្ឌិត ម៉ែន សំអន និងក្រុមគ្រួសារមានសុខភាពល្អ និង​ទទួលបាននូវពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕