លោកជំទាវ ម៉ែន សំអន ៖ សន្តិភាព​មាន​តម្លៃមិនអាចកាត់ថ្លៃបាន និង​ជា​កត្តាសំខាន់សម្រាប់​ការអភិវឌ្ឍន៍ជាតិ

លោកជំទាវក៏បានថ្លែងនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និង សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជូនដល់អង្គពិធីផងដែរ។

ថ្លែងក្នុងឱកាសនោះ លោកជំទាវក៏បានមានប្រសាសន៍ថា ៖ ប្រទេសជាតិបច្ចុប្បន្នទទួលបានសុខសន្តិភាព និងការរីកចំរើន និង​ការអភិវឌ្ឍន៍​លើគ្រប់វិស័យក្រោមការដឹកនាំប្រកបដោយកិត្តិបណ្ឌិតរបស់ សម្តេចតេជោនាយករដ្ឋមន្ត្រី ដោយបានខិតខំកសាងប្រទេសពីបាតដៃទទេ ស្តារ និងកសាងឡើងវិញជាបណ្តើរៗនូវហេដ្ឋារចនាសម្ព័ន្ធរូបវ័ន្តដូចជា ផ្លូវថ្នល់ ស្ពាន ទំនប់ ប្រឡាយ សាលារៀន មន្ទីរពេទ្យ និងវត្តអារាម ។ល។ រហូតទទួលបាននូវការអភិវឌ្ឍន៍លើគ្រប់វិស័យ ដូចដែលយើងទាំងអស់គ្នាបានឃើញសព្វថ្ងៃនេះ ដែលក្នុង​នោះ​ខេត្តស្វាយរៀង​ក៏មាន​រោងចក្រ សហគ្រាស ក្រុមហ៊ុន ប្រមាណជា ១៩៧កន្លែង ដែលអាចទាក់ទាញកម្លាំងពលកម្មបានប្រមាណជាង ៨ម៉ឺននាក់។ ជាក់ស្តែង​សមិទ្ធិផល​ថ្មីដែលដាក់សម្ពោធនាពេលនេះ ដែលជាអំណោយដ៏ថ្លៃថ្លារបស់ ឯកឧត្តមនាយឧត្តម ចៅ ភិរុណ អគ្គនាយក​នៃអគ្គនាយកដ្ឋាន​សម្ភារៈ បច្ចេកទេសក្រសួងការពារជាតិ និងលោកជំទាវ បានបង្ហាញអំពីការរីកចម្រើននៃខេត្តស្វាយរៀងផងដែរ។

លោកជំទាវក៏បានបន្តទៀតថា ៖ កងកម្លាំងប្រដាប់អាវុធមានភារកិច្ចធំៗជាចំបងគឺ ការពារ និងធានាសន្តិសុខ ស្ថិរភាពនយោបាយរបស់ជាតិ ដែលជាកត្តាចាំបាច់សម្រាប់ទ្រទ្រង់ការអភិវឌ្ឍន៍ប្រទេសជាតិ។

សូមបងប្អូនទាំងអស់ ជាពិសេស កងកម្លាំងប្រដាប់អាវុធ សូមតម្កល់ផលប្រយោជន៍ជាតិជាធំ ត្រូវដើរតាមមាគ៌ារបស់រាជរដ្ឋាភិបាល ដែល​មាន​ សម្តេចតេជោ ជាប្រមុខ ការពារឱ្យខាងតែបាននូវសន្តិភាព ស្ថិរភាព និងសុភមង្គលរបស់ប្រជាជន ប្រឆាំងដាច់ខាតនូវអំពើក្បត់ជាតិ និង​កលល្បិចរបស់ក្រុមក្បត់ជាតិ ដែលដឹកនាំដោយ សម រង្សី។