លោកជំទាវកិត្តិសង្គហបណ្ឌិត ម៉ែន សំអន ៖ ការអភិវឌ្ឍន៍ប្រទេស គឺមានចំណែកចូលរួមពីវិស័យឯកជន

បើតាមរបាយការណ៍របស់ លោក អ៉ឹង ឆៃនួន អគ្គនាយកក្រុមហ៊ុនហង្សមាសហ្គ្រុប បានឲ្យដឹងថា នៅក្នុងអំឡុងឆ្នាំ១៩៩០ គឺអាជីវកម្មរបស់ខ្លួនបានជួលកាសែតវីដេអូតូចៗ។ នៅឆ្នាំ១៩៩៤ បានពង្រីកខ្លួនបើកជាផលិតកម្មហង្សមាស រួចបន្ត បង្កើតជាស្ថានីយ៍វិទ្យុចំនួន២ បន្ថែមទៀត។ ឆ្នាំ២០១១ ក្រុមហ៊ុនក៏សម្រេចបង្កើតស្ថានីយ៍ទូរទស្សន៍ ហង្សមាស HDTV ដោយប្រើប្រាស់ប្រព័ន្ធបច្ចេកវិទ្យា HD ដំបូងគេនៅកម្ពុជា រហូតដល់ឆ្នាំ២០១៤ ដោយមានការគាំទ្រយ៉ាងខ្លាំងពីសំណាក់ ប្រជាពលរដ្ឋទាំងក្នុង និងក្រៅប្រទេស ក្រុមហ៊ុនក៏បានសម្រេចចិត្តបង្កើតស្ថានីយ៍ទូរទស្សន៍មួយទៀតឈ្មោះ រស្មីហង្សមាស HDTV ដើម្បីបំពេញសេចក្តីត្រូវការ ពេលនោះវិទ្យុ និងទូរទស្សន៍របស់ហង្សមាស បានក្លាយទៅជាអ្នកផ្តល់សេវាព័ត៌មាន លឿន រហ័ស ជឿទុកចិត្ត និងប្រកបដោយក្រមសីលធម៌ និងមានវិជ្ជាជីវៈ។

ថ្លែងក្នុងឱកាសនោះ លោកជំទាវបានមានប្រសាសន៍ថា ៖ អគារទំនើប​ដ៏ធំមានកម្ពស់ ៩ជាន់ រួមមាន ស្ទូឌីយោភ្លោះ សាលប្រជុំ ការិយាល័យ អាហារដ្ឋាន និងលំនៅដ្ឋាន​ ដែលសម្ភោធដាក់ឲ្យដំណើរការនាថ្ងៃនេះ គឺជាសមិទ្ធផល​បានមកពីការខិតខំចូលរួមយ៉ាងសកម្មពីក្រុមហ៊ុន ហង្សមាសហ្គ្រុប ដែលជាវិស័យឯកជនក្នុងការរួមចំណែកជាមួយរាជរដ្ឋាភិបាល ក្នុងការអភិវឌ្ឍន៍ប្រទេសជាតិក្រោមម្លប់នៃសុខសន្តិភាព។ ដូច្នេះស្ទូឌីយោថ្មី​របស់ស្ថានីយ៍​ទូរទស្សន៍​ហង្សមាសនេះ ពិតជាចូលរួមជម្រុញបន្ថែមទៀត ការលើកកម្ពស់ការយល់ដឹងរបស់ប្រជាពលរដ្ឋ តាមរយៈការ​អប់រំ ការផ្ស​ព្វផ្សាយច្បាប់ និងចំណេះដឹងផ្សេងៗ។

ទទ្ទឹមនឹងជោគជ័យ និងទទួលបានគាំទ្រយ៉ាងណាក៏ដោយ លោកជំទាវក៏បានសំណូមពរឲ្យក្រុមហ៊ុនត្រូវយកចិត្តទុកដាក់បន្ថែមទៀតលើ៖

ទី១. ត្រូវផ្សាយកម្មវិធីនានា​ប្រកប​ដោយ​គុណភាព និងផ្សាយព័ត៌មាន​ដែលមានខ្លឹមសារបម្រើដល់ប្រយោជន៍ជាតិ​ ដោយវិភាគឱ្យបានគ្រប់ជ្រុងជ្រោយ​ជៀសវាងការលំអៀង។

ទី២. តាមរយៈនូវការផ្សព្វផ្សាយព័ត៌មានពិត ស្របតាមប្រសាសន៍ដ៏ថ្លៃថ្លារបស់ សម្តេចតេជោ កុំបំពានអ្នកដទៃ កុំបំភ្លៃការពិត និងស្នើឲ្យអ្នកគ្រប់គ្រងកម្មវិធីផ្សាយ ត្រូវបន្ត​ច្នៃ​ប្រឌិត បង្កើត និងជាវកម្ម​វិធីល្អៗថ្មីៗថែមទៀត ដើម្បីបម្រើដល់​សេចក្តី​ត្រូវការ​របស់ទស្សនិកជនផង។

ទី៣. សូមជួយយកចិត្តទុកដាក់​ដល់ការ​លើក​ស្ទួយ​វប្បធម៌ និងសីលធម៌ ប្រពៃណីជាតិយើង​ តាមរយៈកម្មវិធីនានា និង​ការបង្ហាញ​សម្លៀក​​បំពាក់ និងអាកប្បកិរិយា ​នៃពិធីករ ពិធីការិនី សិល្បករ និងសិល្បការិនី តារាចម្រៀង និងតារាសម្តែង។