លោកជំទាវកិត្តិសង្គហបណ្ឌិត ម៉ែន សំអន ៖ ស្រ្តីរួមគ្នាថែរក្សាសុខសន្តិភាព ដើម្បីស្ថេរភាពរស់នៅរបស់ក្រុមគ្រួសារ និងស្ថេរភាពរបស់អង្គភាព

លោកជំទាវក៏បានថ្លែងថា ក្រោមការដឹកនាំរបស់សម្តេចតេជោ បានធ្វើឲ្យប្រទេសជាតិ មានសន្តិភាពពេញលេញ និង​មានការអភិវឌ្ឍន៍​រីកចម្រើន​លើគ្រប់វិស័យ។ ទន្ទឹមនឹងសុខសន្តិភាពនេះ នារីខ្មែរក៏បានអភិវឌ្ឍលើកកម្ពស់សមត្ថភាពខ្លួននៅក្នុងស្ថាប័ននីមួយៗ រហូត​ក្លាយជា​ថ្នាក់ដឹកនាំ តាំងពីថ្នាក់ក្រោម រហូតដល់ថ្នាក់ជាតិ។

លោកជំទាវក៏បានជម្រុញដល់មន្ដ្រីគ្រប់លំដាប់ថ្នាក់ ត្រូវរួមគ្នាគាំទ្រ និងលើកកម្ពស់ស្ដ្រី ក្នុងការចូលរួមដឹកនាំ និងអភិវឌ្ឍន៍ប្រទេសជាតិ ឲ្យស្របទៅតាមប្រធានបទ “ មានសន្តិភាព មានការលើកកម្ពស់សមភាពយេនឌ័រ ​” នៃទិវាខួបលើកទី១០៩ ទិវាអន្តរជាតិនារី ០៨មីនា ឆ្នាំ២០២០ នាឆ្នាំនេះ។

លោកជំទាវក៏បានស្នើឲ្យអង្គពិធីទាំងមូលត្រូវយកចិត្តទុកដាក់ ៖

ទី១. ស្រ្តីក្នុងក្របខណ្ឌរបស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តស្វាយរៀង ត្រូវចេះរួមគ្នាដោះស្រាយបញ្ហាប្រឈមនៅក្នុងមូលដ្ឋាន និងការងារផ្សេងៗដែលរាជរដ្ឋាភិបាលបានប្រគល់ជូន។

ទី២. កងកម្លាំងជានារី ត្រូវពង្រឹងសុខសុវត្ថិភាព សណ្តាប់ធ្នាប់សាធារណៈនៅមូលដ្ឋានប្រជាពលរដ្ឋ ត្រូវបង្កើនកិច្ចសហការ​ជាមួយ​គ្នាទូទាំងខេត្ត ក៏ដូចជាបណ្តាខេត្តជិតខាង ដើម្បីថែរក្សានូវសុខសន្តិភាព ទាំងក្នុងកិច្ចអភិវឌ្ឍន៍ប្រទេសជាតិ។

៣. ស្រ្តីរួមគ្នាថែរក្សាសុខសន្តិភាព ដើម្បីស្ថេរភាពរស់នៅរបស់ក្រុមគ្រួសារ និងស្ថេរភាពអង្គភាព។

៤. ស្នើដល់កងកម្លាំងគ្រប់ប្រភេទត្រៀមរៀបចំការពារសណ្តាប់ធ្នាប់ឲ្យបានល្អ សម្រាប់ព្រឹត្តិការណ៍ សង្ក្រានស្វាយរៀង ឆ្នាំ២០២០ ក៏ដូចជាថែរក្សាសន្តិសុខសណ្តាប់ធ្នាប់សាធារណៈទូទាំងខេត្តផងដែរ។

៥. ស្នើបងប្អូនទាំងអស់ត្រូវប្រុងប្រយ័ត្នចំពោះអគ្គីភ័យដែលកើតឡើងជាយថាហេតុ ក្នុងឱកាសបុណ្យចូលឆ្នាំប្រពៃណីជាតិខ្មែរ។

៦. ត្រូវចេះការពារខ្លួន ចេះធ្វើអនាម័យជាប្រចាំ គឺជាជម្រើសដែលល្អបំផុត ដែលការពារខ្លួនបានពីជម្ងឺគ្រប់ប្រភេទ រួមទាំងជម្ងឺ COVID-19 ដែលបច្ចុប្បន្ននេះជម្ងឺ COVID-19 បាននឹងកំពុងរីករាលដាលពាសពេញពិភពលោក៕