លោកជំទាវកិត្តិសង្គហបណ្ឌិត ម៉ែន សំអន បាន​ប្រគេន​ទៀន​ព្រះវស្សា និងទេយ្យវត្ថុ​ដ៏​ថ្លៃថ្លា​របស់​សម្តេចតេជោ និង​សម្តេច​កិត្តិព្រឹទ្ធបណ្ឌិត​ដល់​ព្រះសង្ឃ​គង់ចាំ​ព្រះវស្សា​នៅ​វត្តច័ន្ទគិរី

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច ព្រមទាំង​​លោកជំទាវ ទ្រី សុខា ពិធីការសម្តេចតេជោ និងលោកជំទាវឧកញ៉ា អ៉ឹង ស៊ីស្រ៊ន ប្រគេនទៀនព្រះវស្សា និងទេយ្យវត្ថុ ព្រមទាំង​ថវិកា​ជិត៤០លានរៀល ជាអំណោយដ៍ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដល់ព្រះសង្ឃគង់ចាំព្រះវស្សា​អស់​ត្រីមាស នៅវត្តច័ន្ទគីរី (ហៅវត្តភ្នំចាស់) ស្ថិតក្នុងស្រុកឪរ៉ាល់ ខេត្តកំពង់ស្ពឺ នាព្រឹកថ្ងៃពុធ ១៣កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៣ ខែមិថុនា ឆ្នាំ២០២០។

ថ្លែងក្នុងឱកាសនោះ លោកជំទាវកិត្តិសង្គហបណ្ឌិត ក៏បានពាំនាំនូវការផ្តាំផ្ញើសួរសុខទុក្ខដោយក្តីនឹករលឹកពីសំណាក់ សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនបងប្អូនប្រជាពលរដ្ឋទាំងអស់គ្នា​នៅទូទាំង​ខេត្តកំពង់ស្ពឺ​ដោយសម្តេចទាំងទ្វេរ​តែងតែគិតគូរ​ខ្ពស់ចំពោះជីវភាពប្រចាំថ្ងៃរបស់ប្រជាពលរដ្ឋ។

លោកជំទាវកិត្តិសង្គហបណ្ឌិតបានថ្លែងថា ក្រោយថ្ងៃរំដោះ៧មករា ឆ្នាំ១៩៧៩ មកដល់បច្ចុប្បន្ននេះ អាស្រ័យដោយមានការគាំទ្រយ៉ាងរឹងមាំ ពីសំណាក់ប្រជាពលរដ្ឋគ្រប់ស្រទាប់ជាន់ថ្នាក់ គណបក្សប្រជាជនកម្ពុជា ​ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធាន និងជានាយករដ្ឋមន្រ្តីនៃព្រះរាជាណាចក្រកម្ពុជាបានខិតខំប្រឹងប្រែងបានដឹកនាំប្រទេស ឆ្លងកាត់ឧបសគ្គ និងការលំបាក​យ៉ាងច្រើន​ឥត​គណនា បានស្តារកសាងជាតិឱ្យមានការរីកចម្រើន រក្សាបាននូវ សុខសន្តិភាពពេញលេញ​នៅទូទាំងប្រទេស ព្រមទាំងសម្រេច​បាន​សមិទ្ធិផល​ធំៗ ជាច្រើនទៀតជាប្រវត្តិសាស្រ្តមិនអាចកាត់ថ្លៃបានជូនជាតិមាតុភូមិ និងប្រជាជន។ ក្រោមការដឹកនាំ​ប្រកបដោយកិត្តិបណ្ឌិត​របស់​​សម្តេចតេជោ ក្រោមទស្សនវិស័យវែងឆ្ងាយ គណបក្សបានធ្វើជាស្នូលនៃសាមគ្គីភាពជាតិ ឯកភាពជាតិតែមួយ និងសន្តិភាព ហើយ​ដឹកនាំប្រទេសឈានទៅមុនជានិច្ច តាមទិសដៅដ៏ត្រឹមត្រូវ និងបានបំពេញតួរនាទីដឹកនាំប្រទេសប្រកបដោយការទទួលខុសត្រូវខ្ពស់បំផុត ដោយធានាគ្រប់ដំណើរការនយោបាយ សេដ្ឋកិច្ច សង្គមជាតិ ប្រព្រឹត្តទៅយ៉ាងល្អ ធានាបាននូវសន្តិភាព ស្ថិរភាព ឯកភាពជាតិ និង​ការរស់នៅ​ដ៏សុខដុមរមនារបស់ប្រជាជនទូទាំងប្រទេស។

លោកជំទាវកិត្តិសង្គហបណ្ឌិត ម៉ែន សំអន ក៏បានក្រើនរំលឹកដល់បងប្អូនប្រជាពលរដ្ឋ លោកយាយលោកពុទ្ធបរិស័តចំណុះជើងវត្តទាំងអស់ ឱ្យបន្តការប្រុងប្រយ័ត្នខ្ពស់ពីជំងឺឆ្លងដ៏កាចសាហាវកូវីដ១៩ ដោយបង្កើនការធ្វើអនាម័យដើម្បីសុខភាពរស់នៅឱ្យបានល្អ ជាពិសេស​ត្រូវ​ពាក់ម៉ាស ឬក្រម៉ា និងត្រូវដុសលាងសម្អាតដៃឱ្យបានស្អាតជាប្រចាំជាមួយសាប៊ូ ទឹកអាល់កុល ឬជែលកម្ចាត់មេរោគ។

លោកជំទាវកិត្តិសង្គហបណ្ឌិត ម៉ែន សំអន បានបញ្ជាក់ថា ការចូលព្រះវស្សា គឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឱ្យ​ព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល៣ខែ គឺចាប់ថ្ងៃ១រោច ខែអាសាធ ដល់ទី១៥ កើត ខែអស្សុជ។ ការបញ្ញត្តិឱ្យមាន​ការកាន់ព្រះវស្សា គឺព្រះពុទ្ធជាម្ចាស់ទ្រង់មានព្រះបំណងចង់ឱ្យព្រះសង្ឃ មានភាពងាយស្រួលក្នុងរដូវវស្សារយៈពេលបីខែនេះ ដែល​ជារដូវ​ភ្លៀងធ្លាក់ជោកជាំ។ ពិធីបុណ្យចូលព្រះវស្សា គឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់​សម្រាប់​ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។

លោកជំទាវកិត្តិសង្គហបណ្ឌិត ម៉ែន សំអន ថ្លែងបន្តថា ពិធីបុណ្យនេះដែរ ក៏មានជួបជុំពទ្ធបរិស័ទ នមស្សការព្រះរតនត្រ័យ និមន្តព្រះសង្ឃ ចម្រើនព្រះបរិត្ត ដើម្បីឧទ្ទិសមហាកុសលផលបុណ្យជូនដល់ញ្ញាតិការទាំង ៧ សណ្តាន និងបុព្វការីជនដែលបានចែកឋានទៅ​កាន់​បរមលោក​ខាងមុខ មកទទួលយកផល្លាអានិសង្ឃ ដែលកើតចេញអំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធសាសនា ដែល​ជា​សាសនា​របស់រដ្ឋ។

ទន្ទឹមនឹងនេះដែរ លោកជំទាវកិត្តិសង្គហបណ្ឌិត ម៉ែន សំអន ក៏បួងសួងថ្វាយព្រះពរជ័យ ថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃ គ្រប់ព្រះអង្គ និង ឧទ្ទិសកុសល្យផលបុណ្យគោរពជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ថ្នាក់ដឹកនាំ-សមាជិកព្រឹទ្ធសភា ថ្នាក់ដឹកនាំ-សមាជិករដ្ឋសភា ព្រមទាំងប្រជាពលរដ្ឋនៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នាជារៀងរហូត។

ជាចុងក្រោយ ក៏បានរៀបចំពិធីពុទ្ធាភិសេកព្រះអង្គ តម្កល់ទុកក្នុងភ្នំចាស់ សម្រាប់ទុកជាទីសក្ការៈផងដែរ៕