លោកជំទាវ ម៉ែន សំអន បាន​បង្ហាញនូវ​សុន្ទរកថា​គន្លឹះ ក្នុងពិធីបិទវេទិកាអាស៊ី-អឺរ៉ុប ស្តីពី ស្រ្តី​សន្តិភាព និងសន្តិសុខ ដែល​ជា​ព្រឹត្តិការណ៍​អម​កិច្ចប្រជុំ​កំពូល​អាស៊ី-អឺរ៉ុប លើក​ទី​១៣

លោកជំទាវ ម៉ែន សំអន បន្តថា៖ វេទិកាស្រ្តីជាប្រវត្តិសាស្រ្តនេះ គឺបានឆ្លើយតបតាមការរំពឹងទុករបស៎យើង ព្រោះបើ​ពិនិត្យ​លើ​សាវតា នៃកិច្ចប្រជុំកំពូលនៃទ្វីបទាំងពីរ ចាប់តាំងពីឆ្នាំ១៩៩៦មក នៅមិនទាន់មានព្រឹត្តិការណ៍អមផ្លូវការណាមួយ ដែលពាក់ព័ន្ធនឹងបញ្ហារបស់ស្រ្តីនោះទេ។

ការថ្លែងរបស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង​ទំនាក់ទំនង​ជាមួយ​រដ្ឋសភា​-​ព្រឹទ្ធសភា និងអធិការកិច្ច នាពេលនេះ បានធ្វើឡើងក្នុងគ្រាដែលលោកជំទាវ បានអញ្ជើញជាអធិបតីភាព ក្នុងពិធីបិទវេទិកា អាស៊ី-អឺរ៉ុប ស្តីពី ស្រ្តីសន្តិភាព និងសន្តិសុខ ជាព្រឹត្តិការណ៍អមកិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជា នឹង​ធ្វើ​ជា​ម្ចាស់ផ្ទះនៅក្នុងខែវិច្ឆិកា ឆ្នាំ២០២១ ខាងមុខនេះ ក្រោមមូលបទ “ការពង្រឹងពហុភាគីនិយម ដើម្បីកំណើនរួមគ្នា” បន្ទាប់​ពី​បាន​ដំណើរការអស់រយៈពេល២ថ្ងៃកន្លងទៅ នៅសណ្ឋាគារសូហ្វីតែល រាជធានីភ្នំពេញ ។

លោកជំទាវកិត្តិសង្គហបណ្ឌិត ម៉ែន សំអន បន្តថា៖កម្ពុជាធ្លាប់មានបទពិសោធន៍ និងមេរៀនដ៏ជូរចត់ នៃភ្លើងសង្គ្រាម អស់ជាច្រើនទសវត្សរ៍ ដែលប្រការនេះ បានធ្វើឱ្យប្រជាជនកម្ពុជា យល់ច្បាស់ពីតម្លៃ នៃសន្តិភាព និងស្ថិរភាព ដែលជាមូលដ្ឋានគ្រឹះ ក្នុងការអភិវឌ្ឍប្រទេសជាតិ។ ចាប់តាំងពីថ្ងៃទី២៩ធ្នូ ឆ្នាំ១៩៩៨ ការបញ្ចប់សង្គ្រាម នៅលើទឹកដីមាតុភូមិកម្ពុជា ក្រោមការអនុវត្តនូវ “នយោបាយឈ្នះ-ឈ្នះ” របស់សម្តេចអគ្គមហាសេនា បតីតេជោ ហ៊ុន សែន នាយក រដ្ឋមន្រ្តីនៃព្រះរាជាណាចក្រកម្ពុជា បាននាំមក នូវសុខសន្តិភាព ពេញលេញ និងការឯកភាពជាតិទាំងស្រុង ពិតប្រាកដជាលើកដំបូងនៅក្នុងប្រវត្តិសាស្ត្រកម្ពុជា និងបានខិតខំប្រឹងប្រែងស្តារ កសាងប្រទេសជាតិឡើងវិញ ព្រមទាំងបោះជំហានយ៉ាងរឹងមាំនៅលើមាគ៌ាអភិវឌ្ឍ និងទទួលបានការរីកចម្រើន លើគ្រប់វិស័យគួរជាទីមោទនៈ សមស្របតាមពាក្យស្លោក “មានសន្តិភាព មានការអភិវឌ្ឍ” ។ ជាពិសេស នៅក្នុងដំណាក់កាលដែលពិភពលោក ក៏ដូចជា ប្រទេសកម្ពុជាបាននឹងកំពុងប្រយុទ្ធប្រឆាំងនឹងជំងឺកូវីដ១៩ រាជរដ្ឋាភិបាល ក៏បានដាក់ចេញនូវវិធានការណ៍ជាបន្តបន្ទាប់ តារមយៈ វិធានការណ៍ ៣ការពារ ៣កុំ ដើម្បីទប់ស្កាត់នូវការឆ្លងរីករាលដាលនៃជំងឺនេះផងដែរ ។ មិនត្រឹមតែប៉ុណ្ណោះ រាជារដ្ឋាភិបាលក៏បានស្វែងរកវ៉ាក់សាំង ដើម្បីចាក់ ជូនដល់ប្រជាពលរដ្ឋកម្ពុជានៅទូទាំងប្រទេស ដែលគិតមកដល់ពេលនេះ បានប្រមាណជាង ១៣លាន៥សែននាក់ ស្មើរនឹង ៨៥% នៅលើចំនួន ប្រជាពលរដ្ឋ ១៦លាននាក់ ។ ការចាក់វ៉ាក់សាំងនេះក៏បានផ្តោតជាសំខាន់ លើស្ត្រី និងកុមារ ដើម្បីឈានដល់ការបើកឲ្យដំណើរការនូវសាលារៀន និងដាក់ឲ្យដំណើរការប្រទេសជាប្រក្រតីឡើងវិញផងដែរ ។

នៅក្នុងសុន្ទរកថាគន្លឹះនេះដែរ លោកជំទាវ ម៉ែន សំអន ក៏បានបញ្ជាក់ពី សិទ្ធិ ឋានៈ តួនាទី ឱកាស និងការចូលរួមរបស់ស្រ្តី ត្រូវបានលើកកម្ពស់ជាបន្តបន្ទាប់ ដើម្បីធានាបានកិច្ចអភិវឌ្ឍប្រកបដោយចីរភាព និងបរិយាប័ន្ន សង្គម។ រាជរដ្ឋាភិបាលកម្ពុជាបានចាត់ទុក “ស្រ្តីជាឆ្អឹងខ្នងនៃសេដ្ឋកិច្ច និងសង្គមជាតិ” និងបានដាក់ចេញនូវគោលនយោបាយ ផែនការ សកម្មភាពជាតិ កម្មវិធីជាតិអន្តរវិស័យ សំដៅលើកកម្ពស់សមភាពយេនឌ័រ ពង្រឹងភាពអង់អាចដល់ស្រ្តី ។ ស្រ្តីកម្ពុជា តែងទទួលបាន កាលានុវត្តភាព ចូលរួមក្នុងគ្រប់កិច្ចការអភិវឌ្ឍសេដ្ឋកិច្ច-សង្គមជាតិ ទាំងផ្នែកវិស័យ សាធារណៈ សន្តិសុខ នយោបាយ ការទូត ឯកជន អង្គការជាតិ-អន្តរជាតិ និង ត្រូវបានលើកទឹកចិត្តឱ្យចាប់យកតួនាទីសំខាន់ៗ ដោយស្មើភាព និង គ្មាន ការរើសអើង។ ទន្ទឹមនេះ ស្ត្រីមានលទ្ធភាពកាន់តែច្រើន ក្នុងការទទួលបានការសិក្សាអប់រំ ការពង្រឹងភាពអង់អាចផ្នែកសេដ្ឋកិច្ច ការទទួលបានសេវាសុខភាពបឋម សុខភាពបន្តពូជ សុខភាព មាតា និងទារក ឤហារូបត្ថម្ភ ការកាត់បន្ថយ និងទប់ស្កាត់ជំងឺឆ្លង ការទទួលបានជំនួយផ្នែកច្បាប់ដោយ ឥតគិតថ្លៃ សម្រាប់ស្រ្តី និងក្មេងស្រីក្រីក្ររងគ្រោះ ដោយអំពើហិង្សាគ្រប់ទម្រង់ តាមរយៈក្រុមមេធាវីស្ម័គ្រចិត្តរបស់សម្តេចតេជោ និងគណៈមេធាវី ។

ទោះជាយ៉ាងណាក៏ដោយ លោកជំទាវកិត្តិសង្គហបណ្ឌិត ម៉ែន សំអន ក្នុងនាមរាជរដ្ឋាភិបាលកម្ពុជា ស្នើសុំឱ្យប្រទេសចូលរួមទាំងអស់ ប្រែក្លាយលទ្ធផល នៃវេទិការបស់យើងនាពេលនេះ ទៅជាសកម្មភាពជាក់លាក់ ប្រាកដនិយម និងបានកោតសរសើរដល់ក្រសួង កិច្ចការនារី អំណរគុណ ដល់វាគ្មិន ជាពិសេសស្រ្តីជា កងកម្លាំងថែរក្សាសន្តិភាពពិភពលោក ក្រោមឆត្រអង្គការសហប្រជាជាតិ ដែលបានចែករំលែកពីបទពិសោធន៍ល្អៗ បញ្ហាប្រឈមក្នុងអំឡុងពេលបេសកកម្ម ចែករំលែកនូវវីរភាពរបស់ខ្លួន ដែលបានឃ្លាតចាកឆ្ងាយពីក្រុមគ្រួសារ ពីប្រទេសកំណើត លះបង់ដើម្បីបុព្វហេតុសន្តិភាព ទូទាំងពិភពលោក ហើយវីរៈភាពនេះ គឺជាកម្លាំងចិត្តដ៏សំខាន់ ដើម្បីរួមចំណែកជំរុញឱ្យស្រ្តី និងក្មេងស្រីផ្សេងទៀត មានភាពក្លាហាន ដើម្បី ស្ម័គ្រចិត្តចូលរួមក្នុងមុខជំនាញមិនប្រពៃណីនេះ ។

គួររំលឹកថា ៖ ចំនួនស្ត្រីនៅកម្ពុជា កំពុងទទួលបានក្នុងមុខតំណែងជាអ្នកដឹកនាំ បានកើនឡើង នៅគ្រប់ស្ថាប័ន ។ គិតត្រឹមឆ្នាំ២០២១ ស្ត្រីមានចំនួន២១ ភាគរយ កាន់តំណែង នៅក្នុងរដ្ឋសភា និង ១៦ ភាគរយ នៅក្នុងព្រឹទ្ធសភា ។ ហើយក៏មានជាឧបនាយករដ្ឋមន្ត្រី ជាស្ត្រី ១រូប រដ្ឋមន្ត្រីជាស្ត្រី ៣រូប និង អភិបាលខេត្ត ជាស្ត្រី២រូប ។ បើប្រៀបធៀប នៃការសមាមាត្រ ស្ត្រី នៅក្នុងសេវាកម្មស៊ីវិល បានកើនឡើង ពី៣៨ ភាគរយ ក្នុង ឆ្នាំ ២០១៤ ទៅដល់ ៤១ភាគរយ នៅឆ្នាំ២០២១ និងសមាមាត្រ តំណាងរបស់ស្ត្រី នៅក្នុងការសម្រេចចិត្ត នៅកម្រិត អនុប្រធាន ការិយាល័យ ថ្នាក់ ក្រុង ស្រុក និង ខណ្ឌ រហូតដល់អគ្គនាយក បានកើនឡើងពី ២០ ភាគរយ ក្នុងឆ្នាំ ២០១៤ ដល់ ២៥ភាគរយ ក្នុងឆ្នាំ ២០១៩ ៕